Almaty oblysynda áriptesi jaraqattaǵan polıtseıdiń jaǵdaıy belgili boldy
TALDYQORǴAN. QazAqparat – Almaty oblysynda áriptesi jaraqattaǵan polıtseıdiń jaǵdaıy belgili boldy, - dep habarlaıdy QazAqparat tilshisi.
«28 kúni Raıymbek aýdandyq aýrýhanasyna túsken polıtsııa qyzmetkeriniń jaǵdaıy ortasha aýyr. Qazir ol hırýrgııalyq bólimde em qabyldap jatyr. Oń jaq aıaǵynyń artqy bóliginen jaraqat alǵan. Ota jasaldy», - dedi Almaty oblystyq densaýlyq saqtaý basqarmasy baspasóz qyzmetiniń ókili Láılim Áýbákirova.
Esterińizge sala keteıik, 27 sáýirde tún ortasynda Raıymbek aýdanynda aýdandyq ishki ister organdarynyń eki qyzmetkeri arasynda turmystyq janjal boldy.
«Saldarynan olardyń biri tabeldik qarý qoldanǵan. Ýchaskelik ınspektor jambasynan oq jaraqatyn alyp, Narynqol aýylynyń aýrýhanasyna jatqyzyldy. Ne jaǵdaı bolǵanyn tekserý úshin oqıǵa ornyna bardyq. Nátıjesinde oqıǵanyń barlyq mán-jaıy anyqtaldy», - dep jazdy Serik Kúdebaev Feısbýktegi paraqshasynda.
Qazir osy oqıǵaǵa oraı QR Qylmystyq kodeksiniń 24-baby 3-bóligi, 99-baby 1-bóligi («Adam óltirýge oqtalý») boıynsha sotqa deıingi tergeý bastaldy.
Sonymen qatar, qyzmettegi kemshilikteri jáne jeke quramǵa baqylaýdy álsiretkeni úshin aýdandyq polıtsııa bólimi basshysynyń syrtqy qyzmetterge jaýapty birinshi orynbasary qyzmetinen bosatyldy.
«Áriptesimen janjaldasqan qyzmetkerler jumystan shyǵarylyp, birqatar laýazymdy tulǵa qatań tártiptik jaýapkershilikke tartyldy», - dep jazdy ol.
Almaty oblysy polıtsııa departamentiniń basshylyǵy zań men tártipti saqtaý boıynsha jan-jaqty sharalar qabyldaıdy, dep tolyqtyrdy óńir polıtsııasynyń bastyǵy.
