Almaty oblysynda anasy men qyzy 9 jyl boıy «quldyqta» bolǵan
ALMATY.QazAqparat- Almaty oblysynda qyzy men anasyn belgisiz bireýler urlap áketip, fermada quldyqta ustaǵan. Bul týraly QazAqparat tilshisine jábirlenýshiniń jeńgesi Janar Kenjebekqyzy aıtyp berdi.
Janar Kenjebekqyzynyń kelini osydan 9 jyl buryn jumys izdep shyqqan. Sodan jumysqa turǵyzamyn degen belgisiz bireýlerge aldanyp, kóligine otyryp ketken.
«Jumys beremiz degenge senip qalǵan, qolynda bir qujaty joq. Áıel adam álsiz bolǵannan keıin, onyń ústine kúsh kórsetken bolýy kerek, qashyp shyǵa almaǵan. Bıyl onyń densaýlyǵy syr bere bastaǵan soń jumysqa jaramaıtynyn bilgen álgiler Gúldala degen jerge ákelip tastaǵan. Sol jerden týystar habar berip, bizdi shaqyrtty. Nargız meniń qaıyn sińilim bolyp keledi. Qyzy Dilnazdy bizge tapsyryp, qolyndaǵy úsh balasymen kelinim sheshesimen birge turýǵa ketti»-dedi Janar Kenjebekqyzy.
Qara jumysqa jegilgen ana azaptan qutylǵan kezde 11 jastaǵy qyzyn asyraýdan bas tartqan. Búginde Dilnaz aǵasy men jeńgesiniń úıinde turady.
«Anasy bas tartqany ras. Bul týraly qolhat jazyp qaldyrdy. Qyz bizdiń qolymyzda, qazir 3 synypty bitirdi..» -dedi Janar Kenjebekqyzy.
Aǵasy Abdýsamat Zaıtovtyń aıtýynsha, quldyqta bolǵan qaryndasyn jan-jaqtan, shekara asyp ta izdegen. Kelinshegin izdegen kúıeý balasynyń da áreketinen nátıje bolmaǵan.
11 jastaǵy Dilnazdyń ákesi Qazaqstanda turady. Balasyn asyraýǵa qulqy joq kórinedi. «Quldyqtan» bosap shyqqan Nargız aýdandyq ishki ister bólimine aryz jazǵan eken. Atalǵan derekterge baılanysty quqyq qorǵaý oryndarynan túsinikteme alýǵa tyrystyq.
«Bul isti sotqa deıingi tergeýdiń biryńǵaı tizimine engizdik. Atalǵan faktiler boıynsha sotqa deıingi tergeý amaldary júrýde. Kúdiktiler anyqtaldy. Jábirlenýshi quldyqta bolǵany nemese óz erkimen jumys isteýge barǵany anyqtalyp jatyr»-dedi Almaty oblysy ІІD baspasóz hatshysy Kóbeıhan Nurahmet.
Bul oqıǵa týraly eń alǵash bloger Rınat Kıbraev ıýtýb jelisindegi kanalynda jarııalaǵan edi.
