Almaty oblysynda ámbebap dene shynyqtyrý kesheni ashyldy
TALDYQORǴAN. QazAqparat - Búgin Alakól aýdany Úsharal qalasynda memlekettik- jekemenshik áriptestik aıasynda salynǵan jekpe-jek jáne kúsh qoldanylatyn sport túrlerine arnalǵan «Tarlan» atty ámbebap dene shynyqtyrý-saýyqtyrý kesheni ashyldy, dep habarlaıdy QazAqparat oblys ákiminiń baspasóz qyzmetine silteme jasap.
Jańa sport kesheninde kelýshilerdiń sporttyń boks, kúres, dzıýdo, taekvondo, aýyr atletıka jáne fýtbol túrlerimen aınalysýǵa barlyq múmkindikter qarastyrylǵan. Jergilikti turǵyndardyń qýanyshyn bólisýge Almaty oblysynyń ákimi Amandyq Batalov arnaıy keldi.
«Memleket basshysynyń tapsyrmalaryn oryndaý maqsatynda Almaty oblysynda sportty damytý men halyqty salaýatty ómir saltyn ustanýǵa tartý baǵytynda belsendi jumystar júrgizilýde. Búgingi kúni óńirde 3 myńnan astam sportpen shuǵyldaný oryndary men 37 sport mektebi qyzmet kórsetýde. Jalpy oblys boıynsha 500 myńnan astam adam sportpen turaqty túrde aınalysady. Sporttyń gandbol, kógaldaǵy hokkeı, regbı, at jáne ulttyq sport túrleri boıynsha jattyqtyratyn balalar men jasóspirimderge arnalǵan sport mektepteri de jumys istep tur. Buqaralyq sportty damytýdy jalǵastyra otyryp, biz, oblystyń barlyq aýdandary men qalalarynda dene shynyqtyrý - saýyqtyrý keshenderin (DSK) salýdy josparlap qoıdyq. Bul ıgi iste bizge memlekettik-jekemenshik áriptestik úlken qoldaý kórsetýde. Búgin bárimiz birigip, osyndaı DSK-nyń birin ashqaly turmyz. Osy DSK-dan aty álemge tanylatyn jańa chempıondardyń jattyǵyp shyǵaryna senim bildiremin. Barshańyzdy osynaý aıtýly sharamen shyn júrekten quttyqtaımyn», - dedi A.Batalov.
Osydan keıin jınalǵan kópshilikti bokstan Olımpıada chempıony Bahtııar Artaev quttyqtady.
Dene shynyqtyrý-saýyqtyrý kesheniniń qurylysyna 550 mln teńge bólingen. Qurylys jumystary ótken jyldyń sáýirinde bastalǵan bolatyn. Qurylysty júrgizgen - «BB Company» JShS. Ǵımarattyń aýdany 1100 sharshy metr, al keshenniń jalpy aýdany - 6000 sharshy metr. Túrli sportqa beıimdelgen zaldardan bólek, jattyqtyrýshylar men dárigerler bólmesi, kıim aýystyrý jáne jýyný bólmeleri qarastyrylǵan. Fýtbol alańy men «Street workout» qalashyǵy keshenge japsarlasa ornalasqan.
Aıta ketý kerek, qazirgi tańda Almaty oblysynyń Jambyl, Eńbekshiqazaq, Kerbulaq jáne Alakól aýdandarynda jalpy sany 4 dene shynyqtyrý-saýyqtyrý kesheni salynǵan. Sondaı-aq Qarasaı aýdanyndaǵy Qaskeleń qalasy men Shamalǵan aýylynda, Talǵar aýdanynyń Talǵar qalasynda, Raıymbek aýdanynyń Kegen aýylynda, Aqsý aýdanynyń Jansúgirov kentinde DSK qurylysy júrip jatyr.
