Almaty oblysynda «Altynemel» ulttyq parkiniń ınspektory sottaldy
TALDYQORǴAN. QazAqparat - Almaty oblysynda «Altynemel» ulttyq parkiniń ınspektory bolǵan Erlan Jetenov 6 jylǵa sottaldy. Ol mas kúıinde kólikti tizgindep, joldyń qarsy baǵytyna shyǵyp ketip, eki adamdy qaǵyp óltirgen, dep habarlaıdy QazAqparat tilshisi.
Almaty jáne Taldyqorǵan qalalarynda eki ret júrgizilgen saraptama qorytyndylary E. Jetenovtyń ishimdik ishken kúıinde kólikti basqaryp, joldyń qarsy betine shyǵyp ketkenin dáleldep bergen. 1961 jylǵy Kerbulaq aýdany Basshı aýylynyń turǵyny sot úkimine sáıkes, jazasyn qylmystyq atqarý júıesiniń qaýipsizdigi barynsha tómen mekemesinde óteıtin bolady. QR QK 345-baby 4-bóligi boıynsha kináli dep tanylǵan sottalýshy jábirlenýshilerge 2 mıllıon teńge moraldyq shyǵyn tóleýge mindetteldi. Biraq sottalýshy ózin kináli dep sanamaıdy.
«Ózimdi kináli dep eseptemeımin. Biraq ókinemin. Ádeıi istegen joqpyn», - dedi sot zalynda Erlan Jetenov.
Aıta ketý kerek, jol-kólik apaty 2017 jylǵy qazan aıynyń 23 kúni Basshı-Nurym aýyldarynyń arasyndaǵy tas jolda bolǵan. Jol kólik apatynan qaıtys bolǵan eki azamat qaıyn atasy men kúıeý balasy bolyp shyqty. Ekeýi sol kúni maldyń jaıyn bilmek bolyp mototsıklmen qystaqqa shyqqan eken. Alaıda qaıtyp kele jatqan jolda ishimdikke toıyp alǵan aýyldastary Erlan Jetenovtyń Mazda kóliginen ajal qushqan. 66 jastaǵy Aıtqoja Terlikbaev oqıǵa ornynda, al 44 jastaǵy kúıeý balasy Erlan Sabdenbaev 18 kúnnen keıin aýrýhanada jan tásilim etken. Kerbulaq aýdanynda bastalyp, segiz aıǵa jalǵasyp, Kóksý aýdanynda núkte qoıylǵan sot úkimine jábirlenýshi tarap qanaǵattanbaı otyr. Olar sottalýshyǵa jeńil jaza taǵaıyndaldy dep sanaıdy, sol sebepti appelıatsııalyq shaǵym túsirmek.
