Almaty oblysynda alty balanyń anasy eski monshada bosanǵaly otyr
TALDYQORǴAN.QazAqparat - Almaty oblysynyń Qarasaı aýdanyndaǵy Jambyl aýylynda alty balanyń anasy eski monshada bosanǵaly otyr. Aı-kúni jaqyndap qalǵan Gúlbaný Ysqaqova amaldyń joqtyǵynan osy jerdi panalap otyrǵanyn aıtty, dep habarlaıdy QazAqparat tilshisi.
«Basqa jerdi jaldaýǵa aqshamyz joq jáne kópbalaly adamǵa eshkim jalǵa páterin bergisi kelmeıdi. Amal joq, qulaıyn dep turǵan monshada turyp jatyrmyz. Jaýyn jaýsa tóbeden sý sorǵalaıdy. Jaýynnyń astynda otyramyz. Al qar jaýsa azynap ketedi. Tek tórt qabyrǵasy bar degen aty ǵana», - deıdi kópbalaly ana Gúlbaný Ysqaqova.
Gúlbanýdyń aıtýynsha, onyń joldasy úshinshi toptaǵy múgedek eken. Ár jerde jaldanyp jumys isteıdi. Al tapqan tabysy balalarynyń tamaǵynan aspaıdy. Eresek uly da osy ákesine kómektesedi. Al tuńǵysh qyzy kolledjde oqıdy eken. Qarasaı aýdanyndaǵy ákimdiktegiler kópbalaly ananyń jaǵdaıymen tanyspyz, biraq tez arada másele sheshilmeıdi dep otyr.
«Qaskeleń qalasynda Qarlyǵash yqsham aýdanynda jeke kásipker Elaman JShS tarapynan kredıttik úıler salynyp jatyr. Ol úıler «Turǵyn úı qurylys jınaq banki» arqyly berilip jatyr. Qazirgi tańda bólim tarapynan, ákimshilik tarapynan turǵyn úıler berilip jatqan joq», - dedi Qarasaı aýdandyq turǵyn úı ınspektsııasy bóliminiń bas mamany Erbol Naǵashybaev.
Tyǵyryqqa tirelgen ana endi jany jomart jandardan kómek suraıdy.
Turmys taýqymetin tartyp otyrǵan otbasyǵa qol ushyn sozýǵa nıetti jandar myna nomerge habarlasýlaryna bolady: 8 778 140 57 24
