Almaty oblysynda alǵashqy aýyldyq tirek mektebi paıda boldy
Uzynǵash aýylynda ornalasqan T. Rysqulov atyndaǵy mekteptiń materıaldyq-tehnıkalyq bazasy tolyq jańaryp, zamanaýı bilim berý tehnologııalary engizildi. Mektep úsh aýysymdy, onda 2 083 oqýshy oqıdy jáne 219 muǵalim sabaq beredi. NZM standarty boıynsha 37 oqý kabıneti men sheberhanasy, sondaı-aq STEM zerthana, ART stýdııa, ıntellektýaldyq holl, kitaphana jáne telestýdııa jabdyqtaldy.
«Bilim týraly» zańda «tirek mektepter» degen uǵym bar, olar óz kezeginde quzyrettilik ortalyqtary bolýy kerek jáne basqa mektepterde, ásirese az qamtylǵan mektepterde oqytý sapasyn arttyrýǵa yqpal etýi qajet. Osy jaǵdaıdy taldaǵan kezde aýyl mektepterin damytý boıynsha birde-bir keshendi baǵdarlama bolmady. Sondaı-aq, PISA halyqaralyq reıtıngine sáıkes Qazaqstanda aýyldaǵy bilim deńgeıi tómen. Sondyqtan, seriktesterimiz – BTDQ jáne NZM-men birlesip, biz aýyl jáne qala mektepteri arasyndaǵy alshaqtyqty azaıtý úshin baǵdarlamany ázirlep, oqý oryndaryn jabdyqtaýdy, jańa standarttar boıynsha oqytýdy bastadyq. Ótken jyldan bastap 17 tirek mektepti qurǵan bolsaq, endi aýdandar men monoqalalarda bilim berý transfertin keńeıtip, taǵy 53 tirek aýyldyq mektep qurǵymyz keledi», - dep atap ótti «Qazaqstan halqyna» qoǵamdyq qorynyń basqarma tóraǵasy Bolat Jámishev.
Bilim berýdi turaqty damytý qory NZM-men birlesip mekteptegi bilim berý ortasy men oqytý sapasyna taldaý júrgizdi, sondaı-aq mektepti damytý, bilim berý sapasyn arttyrý boıynsha usynymdar ázirledi, muǵalimderge qajetti biliktilikti arttyrý kýrstaryn anyqtady. Pán muǵalimderi respýblıkalyq bilim berý baǵdarlamalary ortalyǵy jattyqtyrýshylarynyń eki kúndik kýrstarynan jáne qarqyndy oqytý baǵdarlamasynan ótti.
Aıta ketsek, «Aýyldyq jerlerde tirek mektepterdiń áleýetin damytý» baǵdarlamasy boıynsha «Qazaqstan halqyna» qory 17 aýyldyq tirek mektepti qurdy. Jobanyń bıýdjeti – 4 mlrd 250 mln teńge (1 mektepke shamamen 250 mln teńge).
