Almaty oblysynda alǵash ret qulaǵy estimeıtin naýqasqa ota jasaldy
Almaty kópsalaly klınıkalyq aýrýhanasynda kohlearlyq ımplantatsııa boıynsha joǵary tehnologııalyq ota jasaldy. Mundaı hırýrgııalyq otalar eki qulaǵy da sańyraý nemese 4-dárejeli estý qabiletin joǵaltqan adamdarǵa jasalady.
«Kohlearlyq ımplantatsııa» ádisi boıynsha estý júıkesiniń talshyqtaryn tikeleı elektrlik yntalandyrý arqyly ishki qulaqqa elektrodtyq júıelerdi engizedi.
Kohlearlyq ımplantatsııa elimizdiń birneshe klınıkalarynda ǵana júzege asyrylady. Búgingi kúni, Almaty kópsalaly klınıkalyq aýrýhanasynyń dárigerleri medıtsına ǵylymdarynyń doktory, professor, «Otorınolarıngologııa Ulttyq medıtsınalyq zertteý ortalyǵy» FMBÝ dırektorynyń halyqaralyq qyzmet jónindegi orynbasary Dıab Hassannyń qatysýymen ota jasap, tájirıbemen almasty.
«Master-klass aıasynda 8 ota jasaldy. Olardyń arasynda kohlearlyq ımplantatsııa, endolımfa qapshyǵyn drenajdaý, tımpanoplastıka jáne ossıkýloplastıkamen sanıtarlyq operatsııalar boldy. Bul eresek adamdar bolǵandyqtan, kópshiliginde qosalqy aýrýlar bar, sondyqtan dárigerler aldymen tolyq dıagnostıkadan ótken naýqastarǵa josparly túrde ota jasaýdy jón kórdi. Endi kezekte, oblys turǵyndary kópsalaly aýrýhana qabyrǵasynda estý qabiletin qalpyna keltirýge tolyq múmkindikteri bar», - dedi professor Dıab Hassan.
«Almaty oblysy boıynsha dıspanserlik esepte qulaq aýrýlary bar, onyń ishinde estý qabiletinen aıyrylǵan 1000-nan astam naýqas tirkeýde tur. Otorınolarıngologııalyq kómek kórsetýdi arttyrý qajettiligin eskere otyryp, biz Almaty oblysynda alǵash ret kohlearlyq ımplantatsııa boıynsha ota jasadyq. Buryn bizdiń naýqastarda mundaı múmkindik bolmaǵan edi, oblys turǵyndary úlken qalalardaǵy klınıkalarǵa barýǵa májbúr bolǵan.»Kohlearlyq ımplantatsııa naýqastyń estý qabiletin 100% qalpyna keltirýge múmkindik beredi. Biraq bul dybys álemine qaıtýdyń tek alǵashqy qadamy, sodan keıin estý-sóıleýdi qalpyna keltirý kerek. Bizdiń maqsatymyz-Almaty oblysynyń turǵyndarymen qatar ózge de aımaq turǵyndarynyń estý qabiletin qalpyna keltirýge kómektesý«, - deıdi bólimshesiniń meńgerýshisi Ásel Asqarqyzy.
