Almaty oblysynda ákesi órtep jibergen qyz qaıtys boldy
TALDYQORǴAN. QazAqparat - Almaty oblysynda ákesi órtep jibergen qyz kóz jumdy. Denesiniń 90 paıyzǵa jýyǵyn kúıik shalǵan Arýjan osydan úsh kún buryn Іle aýdandyq aýrýhanasyna túsken bolatyn, dep habarlaıdy QazAqparat tilshisi.
Atalǵan jaıtty oblystyq densaýlyq saqtaý basqarmasynyń baspasóz hatshysy Dınara Luqpanova rastady.
«18 jastaǵy qyz bala búgin tańerteńgi saǵat jetiler shamasynda qaıtys boldy», dep málim etti ol.
Esterińizge sala keteıik, bul oqıǵa Almaty oblysynda 20 jeltoqsan kúni boldy. Tańǵy saǵat tórt shamasynda Іle aýdanyndaǵy Ótegen batyr aýylynda 45 jastaǵy azamat ózin jáne eki birdeı balasyn órtep jibergen. Aldyn ala boljam boıynsha, áıelimen ajyrasyp ketken kúıeýi burynǵy otbasyna kelip, ústine benzın quıyp, ózin órtep jibergen. Sol sátte bólme órtke oranyp eki balasy da qyzyl jalynnyń ortasynda qalǵan. Er azamat 12 jastaǵy ulymen oqıǵa ornynda tilge kelmesten kóz jumǵan. Al 1999 jylǵy qyz bala aýyr halde aýrýhana jetkizilgen. 1973 jylǵy azamatty mundaı qadamǵa ne ıtermelegeni belgisiz. Onyń 1971 jylǵy burynǵy áıeli din aman. Qazir QR QK 99 baby 2-shi tarmaǵy boıynsha is qozǵalyp, tergeý jalǵasýda.
