Almaty oblysynda aǵaly-qaryndas esirtki óndirisimen aınalysyp kelgen
«Almaty oblysy Polıtsııa departamentiniń esirtki qylmysyna qarsy is-qımyl jónindegi qyzmetkerleri Talǵar aýdanynda esirtkiniń jasyryn óndirisin joıdy. Kúdiktiler – týystyq qatynastaǵy jigit pen qyz sıntetıkalyq esirtkini óndirý jáne ótkizý faktilerin anyqtaý boıynsha júrgizilgen «Refleks» arnaıy operatsııasy barysynda polıtsııanyń nazaryna ilikti.
Jedel qyzmetkerler barlyq mán-jaıdy anyqtaý jáne kúdiktilerdiń esirtkini óndirý men taratýǵa qatystylyǵyn dáleldeý úshin olardy baqylap júrgen.
Qylmystyq áreket rastalyp, esirtki men shıkizatty qylmystyq maqsatta paıdalaný nemese olardy joıyp jiberý qaýpi týyndaǵan kezde qylmyskerler ustaldy», - delingen habarlamada.
Málim etilgendeı, tintý barysynda 3,6 keli alfa-PVP sıntetıkalyq esirtkisi (7200-den astam birrettik doza), prekýrsorlar, respıratorlar jáne sıntetıkalyq esirtki zattaryn daıyndaýǵa qajetti qurylǵylar alyndy.
«Ustalǵandardyń jaýabynan belgili bolǵandaı, esirtki óndirýmen aınalysý ıdeıasy birneshe aı buryn paıda bolǵan. Aldymen olar Almaty qalasynda esirtkini belgili bir jerge jasyrýmen aınalysyp kelgen, keıin olardy óndirýge kóshken.
Talǵar aýdany Tereńqara kentinde úı jaldap, qajetti hımıkattar men jabdyqtardy satyp alǵannan keıin esirtki óndirisin bastaǵan. Ony ótkizý úshin kóterme saýdagerlerdi izdestirgen. Daıyn esirtkini kenttiń mańynda adam júrmeıtin jerlerge Qulja jolynyń boıynda jasyryp otyrǵan. Kúdiktiler esirtki jasyryp jatqan jerlerinde ustaldy», - delingen polıtsııa aqparatynda.
Kúdiktiler ýaqytsha ustaý abaqtysyna qamaldy, olar óz kinásin tolyq moıyndady. QR QK-niń 297-baby 3-bóligi 1,3-tarmaqtary (Adamdar tobynyń aldyn ala sóz baılasýy boıynsha jasalǵan asa iri mólsherdegi esirtki zattaryn zańsyz satyp alý, saqtaý, tasymaldaý ne ótkizý) boıynsha sotqa deıingi óndiris qozǵaldy. Bul bap boıynsha 10 jyldan 15 jylǵa deıin bas bostandyǵynan aıyrý jazasy kózdelgen.
