Almaty oblysynda aǵaly-inili eki balany kólik qaǵyp ketti
TALDYQORǴAN. QazAqparat - Almaty oblysyndaǵy Іle aýdanynyń ortalyǵynda jaıaý júrginshiler ótkelinde balalardy qaǵyp ketken júrgizýshi qamaýǵa alyndy, dep habarlaıdy QazAqparat tilshisi.
Oqıǵa 24 qańtar kúni Ótegen batyr kentinde bolǵan. Jaıaý júrginshiler ótkeli arqyly joldan ótpek bolǵan 11 jáne 13 jastaǵy aǵaly-inili eki balany «HYUNDAI» markaly shaǵyn júk kóligi qaǵyp ketken. Oqıǵa ornynda 11 jastaǵy bala kóz jumdy. Al túrli deńgeıde jaraqat alǵan 13 jastaǵy jasóspirim ambýlatorlyq emdeýge jiberildi.
«Bul fakti boıynsha QR Qylmystyq kodeksiniń 345-babyna sáıkes sotqa deıingi tergeý amaldary júrgizilýde. Qazirgi ýaqytta 23 jastaǵy kólik júrgizýshisi Іle aýdany polıtsııasynyń ýaqytsha ustaý oqshaýlaǵyshynda otyr»,- dedi Almaty oblysy Polıtsııa departamentiniń baspasóz qyzmetinen.
Aıta keteıik, kólik apatynan keıin júrgizilgen medıtsınalyq kýálandyrý nátıjeleri boıynsha jol-kólik oqıǵasy kezinde júrgizýshiniń alkogoldi ishimdik ishpegeni anyqtaldy.
