Almaty oblysynda adasyp ketken 6 turǵyn aman-esen tabyldy
TALDYQORǴAN. QazAqparat - Almaty oblysynda 6 turǵyn aman-esen tabyldy. Balyq aýlaý maqsatynda belgisiz baǵytqa jolǵa shyqqan olardyń kólikteri synyp, eki táýlik boıy dalada túnegen, dep habarlaıdy QazAqparat tilshisi.
Oqıǵa Qaratal aýdanynda oryn aldy. 12 aqpan kúni 6 adam balyq aýlaý úshin, aldyn ala baratyn oryndy bilmeı jolǵa shyǵyp ketken kórinedi.
Adasqan toptyń kólikteri «Kelti» ózeniniń mańynda buzylyp, dalada qalǵan. Degenmen aralarynda aıazdan úsik shalyp, zardap shekkender joq.
«Іzdestirý jumystary osy oryndarda uıaly telefon baılanysynyń keıbir jerlerde ustamaýynan jáne de jotaly aýmaqtar bolýy sebebinen qıyndyq týǵyzdy. Qaratal aýdandyq TJ bóliminiń jetekshiligimen izdestirý toby azamattardy taýyp, qutqarý jáne buzylǵan avtókólikterdi qalyń qardyń qursaýynan alyp shyǵý jumystaryn júrgizdi», dep habarlaıdy TJD baspasóz qyzmeti.
Aıta ketý kerek, balyq aýlaýǵa ketip, joǵalǵandar jónindegi sýyt habar 13 aqpan kúni № 30 órt sóndirý bóliminiń baılanys pýnktine túsken. Osy aqparat der kezinde Qaratal aýdandyq ákimshiligine, Kańbaqty aýyldyq ákimshiligine, ýchaskelik polıtsııa qyzmetine jáne aýdandyq prokýratýraǵa jetkizildi. Oqıǵa ornyna jedel qutqarý toby shyǵyp, turǵyndar 14 aqpanda aman-esen tabyldy.
