Almaty oblysynda adasqan eki sheteldik týrıst qutqaryldy
ASTANA. QazAqparat - Almaty oblysynyń qutqarýshylary adasyp qalǵan eki sheteldik týrısti tapty. Ekeýi de din aman. Olardy Kóksý ózeniniń shatqaldaryn tikushaqpen qaraý kezinde baıqaǵan, dep habarlaıdy 24.kz telearnasy.
Eske sala keteıik, 2 mamyr kúni Reseıdiń 11 adamnan turatyn týrıstik toby Kerbulaq aýdanyndaǵy taýly jotalardy jaıaý aralaýǵa shyqqan. Jolda Inna ıAkovleva men Mengı Kamaa toptan kóz jazyp qalady.
5 táýlik boıy boıjetkender taýda adasyp júrgen. Bul týraly týrıstik toptyń jetekshisi qutqarýshylarǵa habarlaǵan.
- Іzdestirý kezinde shekaralyq qyzmettiń ókilderi men Almaty oblystyq ishki ister departamentiniń qyzmetkerleri kómektesti. Barlyǵy 50 shaqty adam men 7 tehnıka, 1 tikushaq qatystyryldy. Qazir olardyń densaýlyqtary jaqsy. Aýrýhanaǵa barýdan bas tartty, deıdi oblystyq TJD basqarma basshysy Asqar Toıshybekov.
