Almaty oblysynda adam óltirdi degen kúdikpen 31 jastaǵy azamat ustaldy
TALDYQORǴAN.QazAqparat - Almaty oblysynda adam óltirdi degen kúdikpen 31 jastaǵy azamat ustaldy. Eki aıǵa jýyq ýaqyt izdeýde bolǵan 1986 jylǵy turǵyn Almaty qalasyndaǵy jaldamaly páterdiń birinen tabyldy, dep habarlaıdy QazAqparat tilshisi.
Kúdikti 28 aqpan kúni 43 jastaǵy azamatty pyshaqtap, oqıǵa ornynan qashyp ketken. Al zardap shegýshi aýrýhanada 2 táýlikten soń kóz jumdy. Oqıǵa Jambyl aýdanynda bolǵan. Polıtseıler kúdiktini birden anyqtady. Biraq, ol oqıǵa ornynan izin sýytyp úlgergen.
«Krımınaldyq polıtsııa qyzmetkerleri kúdiktiniń mekenjaıyn anyqtap, qolǵa túsirdi. 1986 jylǵy azamat Almaty qalasynda páter jaldap turyp jatqan. Kúdikti jedel áreket etý arnaıy jasaǵynyń ókilderimen Jambyl aýdandyq ІІB jetkizildi», dedi oblystyq ІІD baspasóz qyzmetindegiler.
Qazirgi tańda 31 jastaǵy azamat kinásin tolyqtaı moıyndap otyr. Aıǵaqtyq dálel retinde onyń sýyq qarýy, ıaǵnı pyshaǵy qylmystyq iske tirkeldi. Sotqa deıingi tergeý jumystary jalǵasýda.
