Almaty oblysynda adam qaǵyp, oqıǵa ornynan boı tasalaǵan júrgizýshi ustaldy
TALDYQORǴAN. QazAqparat - Almaty oblysynda júrgizýshi adam qaǵyp, oqıǵa ornynan izin sýytty, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, polıtsııa qyzmetkerleri az ýaqytta jasyrynǵan júrgizýshini anyqtap, ustady.
Oqıǵany tekserý barysynda málim bolǵany, qaıǵyly jáıt aǵymdaǵy jyldyń 11- shildesinde saǵat 13.30 shamasynda Qarasaı aýdanynda bolǵan. Polıtsııaǵa Dolan aýylynyń shetinde er adamnyń denesi tabylǵany týraly habarlama túsken.
«Oqıǵa ornyna jetken jedel-tergeý toby ol aqparatty rastady, biraq jol-kólik oqıǵasyna kináli azamatty taba almady. Sebebi boı tasalaǵan avtokóliktiń markasy da, nómiri de belgisiz. Qaıtys bolǵan adamnyń kim ekeni anyqtalǵannan keıin, onyń 58 jastaǵy jergilikti turǵyn ekendigi jáne qaıǵyly oqıǵanyń saǵat 04:30-dar shamasynda bolǵandyǵy anyqtaldy. Týysqandarynyń aıtýy boıynsha, ol tańerteń Almaty qalasyna jumysqa shyqqan», - dedi Almaty oblysy Polıtsııa departamenti jedel izdeý tobynyń ınspektory polıtsııa maıory Aldııar Taıbekov.
Jedel-izdestirý is-sharalarynyń nátıjesinde Jambyl aýdanynan «Mersedes-Benz 190» markaly avtokóliginiń 25 jastaǵy júrgizýshisi anyqtalyp, ustaldy. Ol bastapqyda mashınanyń turǵan jerin jasyryp, ony kórsetýden bas tartqan, alaıda usynylǵan bultartpas dálelderden keıin kólik quralynyń turǵan jerin kórsetýge májbúr bolǵan.
«Ol kóliktiń oqıǵa kezinde zaqymdanǵan jerlerin jóndep úlgergeni anyqtaldy. Sol kúni ol tańerteń erte «Altyn Orda» bazaryna jumysqa bara jatqan. Jaıaý júrginshini qaǵyp ketken soń qoryqqanynan oqıǵa ornynan boı tasalaǵan», - dep tolyqtyrdy maıor Taıbekov.
Atalǵan derek QR QK 345-baby 3-bóligi, 346-baby 1-bóligi boıynsha tirkelip, tergelýde.
