Almaty oblysynda 9 myńǵa jýyq áıel balanyń qujattaryna elektrondy túrde tapsyrys bergen

 TALDYQORǴAN.QazAqparat - Sońǵy 10 aı ishinde Almaty oblysy boıynsha 9 myńǵa jýyq áıel  proaktıvti tásilmen balanyń qujattaryna tapsyrys bergen. Onyń ishinde 5761 jańa týǵan sábıge týý týraly kýálik berilse, 2500 sábı perzenthanadan shyqpaı-aq balabaqshaǵa kezekke turǵan, dep habarlaıdy QazAqparat tilshisi.

Azamattarǵa arnalǵan úkimet memlekettik korporatsııasynyń Almaty oblysy boıynsha baspasóz qyzmetiniń jetekshisi Gúlden Jylkeldinovanyń aıtýynsha, proaktıvti tásilmen balanyń týý týraly kýáligin rásimdegen analardyń sany artyp keledi.

«ıAǵnı sms habarlama arqyly perzenthanadan shyqpaı jatyp týý týraly kýálikti ala alady, balany balabaqshaǵa kezekke qoıyp, bir jolǵy jáne aı saıyn beriletin tólemaqylaryn rásimdeı alady», - dedi Gúlden Erkimbekqyzy.

Proaktıv arqyly jańa týǵan balaǵa qujattardy rásimdeýdiń basty sharty, áıel adam bosanbaı turyp mobıldi azamattar bazasyna tirkelýi kerek. Oǵan tek jeke kýálik pen mobıldi telefon nómiri ǵana qajet.

«Keıin bosanǵannan keıin aqparattyq derekterdiń bazasy bir bolǵandyqtan 1414 nómirinen sms habarlama arqyly sábıli bolǵan anany quttyqtaıdy. Ary qaraı qujattardy rásimdeý kerek pe, sony  suraıdy jáne tildi tańdaý qyzmet alýshynyń erkinde», - dedi Azamattarǵa arnalǵan úkimet memlekettik korporatsııasynyń Almaty oblysy boıynsha baspasóz qyzmetiniń jetekshisi.

«Tsıfrlyq Qazaqstan» baǵdarlamasy aıasynda Azamattarǵa arnalǵan úkimet memlekettik korporatsııasy kóptegen qyzmetterdi elektrondyq formatta alýǵa múmkindik jasaýda. Úıden shyqpaı-aq memlekettik qyzmetterdi egov portalynan alýǵa bolady. Qyzmet túrleri tipten jeńildeı túsýde. Máselen  proaktıvti tásilmen balaǵa qujattardy rásimdeý endi telefondaǵy «Telegramm bot» qosymshasy arqyly da júzege asýda.