Almaty oblysynda 85 jastaǵy keıýanany jumyssyz júrgen aýyldasy tonap ketti
TALDYQORǴAN. QazAqparat - Almaty oblysynda 85 jastaǵy keıýanany tonaǵan kúdikti ustaldy. Jumyssyz júrgen 33 jastaǵy jigit qarttyń úıine kirip, 35 myń teńgesin tartyp alǵan, dep habarlaıdy QazAqparat tilshisi.
Atalǵan derek 10 qarasha kúni Talǵar aýdanyna qarasty Qarabulaq aýylynda tirkelgen.
«Keıýanany tonaǵan kúdiktini Talǵar aýdanynyń polıtseıleri ustady. Kúdikti sol Qarabulaq aýylynda esh jerde jumys istemeıtin jergilikti turǵyn bolyp shyqty. Zardap shekken adam kúdiktini tanydy. Ókinishke oraı, tonalǵan aqsha tabylmady. Qazir osy faktige oraı QR QK 191-baby «Tonaý» boıynsha sot-aldy tergeý bastaldy»,-dep málimdedi Almaty oblystyq polıtsııa departamentiniń baspasóz qyzmeti.
Atalǵan vedomstvonyń aıtýynsha, kúdikti qolhatpen úıine jiberilgen.
