Almaty oblysynda 81 kásipker jeńildetilgen nesıe aldy
TALDYQORǴAN. QazAqparat - Almaty oblysynyń 81 kásipkeri memlekettik baǵdarlama aıasynda jeńildetilgen nesıe aldy, dep habarlaıdy QazAqparat tilshisi.
Nátıjeli jumyspen qamtý jáne jappaı kásipkerlikti damytý baǵdarlamasynyń ekinshi baǵyty aıasynda «Bıznes Bastaý» kýrsyn aıaqtaǵan alǵashqy top nesıege qol jetkizdi. Aýyl sharýashylyǵyn qarjylaı qoldaý qoryna jalpy somasy 423 mln teńge bolatyn 95 ótinish kelip túsken. Qazirgi tańda 81 kásipkerdiń ótinishi qanaǵattandyryldy. Olarǵa bólingen qarjy kólemi 365 mln 550 myń teńge.
Almaty oblysyndaǵy kásipkerler palatasynyń bólim basshysy Erlan Datqaevtyń aıtýynsha, «Bıznes Bastaý» jobasy jaqsy nátıje berdi. Barlyǵy 3 kezeńde 827 adam oqytylyp, olardyń teń jartysy óz bıznes-jobalaryn sátti qorǵaǵan. Qazirgi tańda 81-i nesıe alyp, 14 ótinish qaralý ústinde.
Onyń sózinshe, eń kóp nesıeni Jambyl aýdanynyń kásipkerleri rásimdedi. Nesıeniń jalpy somasy 162 mln teńge. 110 mln teńgege jýyq qarjyny Qarasaı aýdanynyń kásipkerleri alǵan. Al Іle aýdanynyń turǵyndary 100 mln teńgege jýyq nesıelik qarjy rásimdegen.
Negizgi qarjy mal sharýashylyǵyndaǵy jobalarǵa baǵyttalǵan. Sebebi óńirde et ónimderine suranys joǵary. Sonymen qatar jylyjaı, balyq sharýashylyǵy, sút fermasy men kondıter ónimderin shyǵaratyn tseh ashý jobalary qarjylandyryldy.
Esterińizge sala keteıik, «Bıznes Bastaý» jobasy aıasynda oqytý sáýir aıynda bastalyp, Almaty oblysynyń 7 aýdanynda ótip jatyr.
