Almaty oblysynda 80 jylqy urlaǵan barymtashylar ustaldy
TALDYQORǴAN. QazAqparat - Almaty oblysynda 80 jylqy urlaǵan barymtashy qolǵa tústi, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, bir apta buryn Jambyl aýdanynyń polıtsııasyna 38 jastaǵy jergilikti turǵyn aryzdanyp, ózine tıesili sharýa qojalyǵynan 80 jylqynyń qoldy bolǵanyn jáne 40 mıllıon teńgege jýyq materıaldyq shyǵyn kelgenin aıtqan.
Qylmysty ashýǵa baǵyttalǵan jedel-izdestirý sharalary barysynda kúdikke ilingen eki adam ustaldy. Onyń biri – 29 jastaǵy Ózbekstan azamaty. Ol zardap shegýshiniń sharýa qojalyǵynda malshy bolyp jumys istegen. Ekinshi kúdikti Jambyl aýdany Kókdala aýylynyń 39 jastaǵy turǵyny, kórshisiniń adal malyna aramdyq jasap, qol salǵan jaqyn mańdaǵy ózge sharýa qojalyǵynyń ıesi bolyp shyqqan.
Kúdiktiler bultartpas aıǵaqtardyń arqasynda osy qylmysqa qatysy baryn moıyndady. Tártip saqshylary qoldy bolǵan maldy izdestirý barysynda 36 jylqyny taýyp, ıesine qaıtardy. Qalǵan jylqynyń soıylyp ketkeni anyqtaldy. Tergeý barysynda kúdiktiler sharýa qojalyǵynan jylqylardy uzaq ýaqyt boıy urlap kelgeni jáne mal ıesiniń polıtsııaǵa aryzdanbaǵanyn ońtaıly paıdalanǵany belgili boldy.
Barymtashylar áýel basta 2-3, keıde 5 jylqyny urlaǵan. Olar jalpy sany 80 jylqy satsa, onyń 35-i qulyndy bıe bolǵan. Ońaı jolmen tabylǵan qarjyny óz qajetterine jaratyp otyrǵan.
Eki kúdikti Jambyl aýdany polıtsııasynyń ýaqytsha ustaý ızolıatoryna qamaqqa alyndy. Atalǵan derek boıynsha qoldanystaǵy qylmystyq zańnamanyń 188-1-baby 4-bóliginiń 2-tarmaǵyna sáıkes sotqa deıingi tergeý amaldary júrgizilip jatyr.
