Almaty oblysynda 80 memlekettik qyzmetker jaýapkershilikke tartyldy

TALDYQORǴAN.QazAqparat - Almaty oblysynda 80 memlekettik qyzmetker jaýapkershilikke tartyldy. Olar ekstremızm jáne terrorızmge qarsy áreket etý baǵdarlamasyn durys júzege asyrmaǵan. Qarjyny maqsatsyz jumsaǵan. Al úkimetten bul baǵdarlamany júzege asyrý úshin bir ǵana Almaty oblysyna 6 mlrd teńgege jýyq aqsha bólingen, dep habarlaıdy QazAqparat tilshisi.

Máselen, terrorıstik turǵydan osal obekti bolyp sanalatyn Qarasaı aýdanyndaǵy mektepterge alynǵan beınebaqylaý kameralary tehnıkalyq talaptarǵa saı emes bolyp shyqty.  Osy jaıt boıynsha is qylmystyq tekserý organdaryna jiberildi. 

«80 memlekettik qyzmetker ár túrli jaýapkershilikke tartyldy. Sonyń ishinde 11 adam  ákimshilik, 45 adam tártiptik jáne  24 adam materıaldyq jaýapkershilikke tartyldy. Ákimshik jaýapkershilikke tartylǵan 11 adamnyń árqaısysyna 200 aılyq eseptik kórsetkish kóleminde  aıyppul salyndy»,- dedi Almaty oblysy prokýratýrasy 1-shi basqarmasynyń  ekstremızm jáne terrorızmge qarsy is-qımyl saladaǵy zańdylyqtardy qadaǵalaý bóliminiń bastyǵy Almaz Ábdirasylov.

2013-2017 jyldary aralyǵyndaǵy baǵdarlama boıynsha bólingen qarjyny maqsatsyz jumsap, basy bálege qalǵandar ishinde din isteri, bilim, sport, jastar saıasaty syndy birneshe basqarmanyń qyzmetkerleri bar.