Almaty oblysynda 8 oqýshy sary aýrýǵa shaldyqqan
TALDYQORǴAN. QazAqparat - Jyl basynan beri Almaty oblysynda 8 oqýshy «gepatıt A» dertine shaldyqqan. Onyń jeteýi 14 jasqa deıingi balalar bolsa, bireýi jasóspirim, dep habarlaıdy QazAqparat tilshisi.
Almaty oblystyq qoǵamdyq densaýlyq saqtaý departamenti basshysynyń orynbasary Raıa Aqashevanyń sózinshe, qazir naýqastardyń jaǵdaıy jaqsy.
«Em-domdaryn aldy. Barlyǵy qadaǵalaýda. Jalpy oqý jyly bastalǵaly oblysta 13 adam «gepatıt A» aýrýyna shaldyqqan. Tekeli jáne Eńbekshiqazaq aýdanyndaǵy mektepterde eki jaǵdaıdan tirkeldi. Biraq ol jerdegi naýqastardyń biri kúzde aýyrsa, endi biri jyl basynda shaldyqqan. Biz eger 35 kúnniń ishinde bir mektepte 3 jaǵdaı tirkelse, qatań baqylaýǵa alamyz. Bizde ázirge ondaı jaǵdaı tirkelgen joq», - dedi R. Aqasheva.
Jalpy mamandar óńirde jyldan-jylǵa gepatıt dertine shaldyqqandar sany azaıyp keledi deıdi. Máselen Almaty oblysynda ótken jyly atalǵan dertpen aýyrǵandar sany 22%-ǵa tómendegen.
«Naýqastar sanynyń azaıýyna dárigerlerdiń júrgizgen aldyn alý sharalarymen qatar, vaktsına egý jumystary yqpal etti. Ekpe aqysyz júrgiziledi. 2011 jyldan bastap biz eki jastaǵy balalarǵa da ekpe egemiz. Qazir sol ýaqytta vaktsına alǵan balalar mektepke baryp júr. Biraq olardyń arasynda naýqastanǵandar joq. Bıyl gepatıt A, sibir jarasy, tumaý jáne týlıaremııa juqpaly aýrýyna qarsy ekpe satyp alyndy. Bul vaktsınalarǵa jylyna jergilikti bıýdjetten 400 mlnǵa teńgege jýyq qarjy bólinedi», - dedi R.Aqasheva.
Al qalalyq ınfektsııalyq aýrýhananyń dárigeri Áıgerim Qalıeva sary aýrýdyń alǵashqy belgilerin aıtyp berdi. Maman eger adam álsizdikti sezinip, uıqy basyp, denesiniń sarǵaıǵanyn baıqaıtyn bolsa, birden aýrýhanaǵa barýǵa keńes beredi.
