Almaty oblysynda 8 aýyldyń mádenıet úıi úzdik atandy
Olardyń árqaısysyna 300 myń teńgeden aqshalaı syılyq sertıfıkaty men keshendi dybys apparatýralary berildi, dep habarlaıdy QazAqparat tilshisi.
Jylda ótetin mádenıet kúnderi bıyl ataýyn ózgertti. Oblystyq mádenıet, arhıvter jáne qujattama basqarmasynyń bastaýymen bıyl atalmysh joba «Aýylym -altyn besigim» degen jańa ataýǵa ıe boldy. Baıqaýdyń negizgi maqsaty úzdik aýyldyq mádenıet úıleri men klýbtaryn anyqtaý. Atalmysh baıqaýdyń marapattaý rásimi Taldyqorǵan qalasyndaǵy І. Jansúgirov atyndaǵy Mádenıet saraıynda ótti. Jeńimpazdardy oblys ákimi Amandyq Batalov quttyqtady.
«Halqymyzdyń mádenı ál-aýqatyn arttyrmaı, tolyqqandy el bolý qıyn. Barlyq ónerdiń bastaýyna aınalǵan aýyl mádenıetiniń bolashaǵy - qazaq eliniń rýhanı kemeldenýi. Sol sebepti aýyl jurtshylyǵyna degen kómegimizdi aıamaı, qoldaý tanytý - bizdiń basty mindetimiz. Jyl saıyn ótetin Mádenıet kúnderin ótkizý formaty bıyl ózgertilip, aýyldyq mádenıet úıleri men klýbtary qamtyldy. Bul baıqaýǵa aýyldardaǵy 33 mádenıet nysany qatysty, olardyń barlyǵyna da syılyqtar beriledi. Ár aýylda, árbir eldi mekende úlkender úshin de, jastar úshin de klýbtardyń, mádenıet úıleriniń bolǵany mańyzdy. Sol maqsatta jumys júrgizip kelemiz. Oblystaǵy mádenıet nysandarynyń kúrdeli jóndeý jumystary men jobalyq-smetalyq qujattaryn ázirleýdiń ózine ǵana 1,1 mlrd teńge bólindi. Aldaǵy ýaqytta da birlesip atqarǵan isterimiz jemisti bolsyn! Mádenıetimizdi, baǵa jetpes ónerimizdi nasıhattaý jolyndaǵy eńbegimiz eselene bersin, - dedi Amandyq Batalov.
Saltanatty rásim barysynda qatysýshylardyń barlyǵy da marapattalyp, syılyqtarǵa ıe boldy. Máselen, 10 aýyldyq mádenıet úıi men klýbtarǵa dybys apparatýrasy syıǵa tartylsa, qalǵan 15-ine barlyq qosalqy qural-jabdyqtarymen birge kompıýterler tartý etildi.
Aıta ketý kerek, Almaty oblysynda 563 mádenıet nysany men arhıv bar. Bıylǵy jyly mádenıet salasynyń bıýdjeti 8,3 mlrd teńgeni qurady. Qazirgi kezde Sarqan aýdandyq mádenıet úıi, Jambyl aýdany Myńbaev aýylyndaǵy, Sarqan aýdany Baqaly aýylyndaǵy aýyldyq mádenıet úıleri, Taldyqorǵan qalasyndaǵy memlekettik arhıv ǵımaratyna kúrdeli jóndeý júrgizilip, sol sııaqty 5 mádenıet nysanynyń jóndeý jumystarynyń jobalyq-smetalyq qujattary daıyndalýda.
