Almaty oblysynda 7 synyp oqýshysy óz mektebiniń saıtyn jasap, baıqaýdyń jeńimpazy atandy

TALDYQORǴAN. QazAqparat - Almaty oblysy Aqsý aýdany Jansúgirov aýylynda J.Sydyqov atyndaǵy orta mekteptiń 7 «b» synyp oqýshysy Tımýr Brıjanov óz mektebiniń resmı saıtyn jasap shyqty. Ol osy jobasymen oblystyq «Meniń Otanyma – meniń bastamam» shyǵarmashylyq jobalar baıqaýynda «Medıa jobalar» baǵyty boıynsha júldeli ІІ oryn ıegeri atandy, dep habarlaıdy Almaty oblysy ákiminiń baspasóz qyzmeti.

«Saıt jasaýdy Youtube jelisiniń kómegimen úırendim. Jetekshim, ınformatıka pániniń muǵalimi Gúljan Qulynbaevanyń baǵyt berýimen qosymsha ádebıetterdi oqyp, saıt jasaýǵa arnalǵan tegin Github hostıngin paıdalandym. Saıt úsh tilde júrgiziledi. Aldaǵy ýaqytta mazmuny men formatyn áli de jetildirsem deımin», - deıdi Tımýr Brıjanov.

Saıtqa kirýshiler mekteptiń tarıhymen, tynys-tirshiligimen, ujym quramymen, sońǵy jańalyqtarmen tanysa alady. Jas ónertapqyshtyń aıtýynsha, bolashaqta onlaın kitaphana qurý qolǵa alynady. Mekteptiń saıtyna QR kod arqyly kirý josparlanyp otyr.

«Oqýshym saıt jasaý týraly usynys bildirdi. Sóıtip ekeýmiz bul iske birlese kiristik, men negizinen baǵyt berip otyrdym. Mekteptiń tarıhı málimetterin jınaqtaýǵa, basqa da qajetti aqparattardy úsh tilde tolyqtyrýǵa mektep basshylyǵy kómektesti. Saıtty ázirleýge eki jyldaı ýaqyt ketti. Balalar jylynda bul bizdiń mektep úshin úlken qýanysh bolyp otyr. Búgingi tańda mekteptegi talapty oqýshylarǵa qosymsha sabaqtar júrgizýdi josparlap otyrmyz. Bul rette maǵan Tımýr Brıjanov bilikti kómekshi bolyp júr. Qazirgi kezde saıt jasaýǵa degen qyzyǵýshylyǵy bar 8- 10 synyp oqýshylarynan top qurdyq. Olarǵa aptasyna eki ret sabaq júrgiziledi», - dedi G.Qulynbaev.

Aqsý aýdandyq ákimdiginiń habarlaýynsha, mektep saıtyn qolǵa alǵanǵa deıin T.Brıjanov sanıtarlyq avıatsııa salasynda qoldanylatyn tikushaq maketin qurastyrǵan. Osy jobasymen «Uly ónertapqyshtyqqa alǵashqy qadam» ınnovatsııalyq ıdeıalardyń oblystyq baıqaýynda «Avıatsııa salasyndaǵy jobalar» nomınatsııasy boıynsha júldeli 1 oryn ıegeri atanypty. Tımýr bolashaqta tehnık-baǵdarlamashy bolýdy armandaıdy. Ol armanyna jetýge qazirden-aq qadam jasap keledi.

Tımýrdyń taǵy bir jospary - bolashaqta dúkenderge arnap saıt jasaý. Osy arqyly tutynýshy aýyldaǵy barlyq dúkenderdegi qajetti azyq-túlik baǵasyn saraptap, arzanyn tańdaýǵa múmkindik alady dep esepteıdi.

Sonymen qatar úıde otyryp qajetti taýarǵa onlaın tapsyrys berýge múmkindik jasaý kózdelýde. Atap óterligi, oblystaǵy mektepterde 227 robototehnıka úıirmesi jumys isteıdi. Olarda 2500-ge jýyq bala dáris alýda. Sol sııaqty zamanaýı tehnıkamen jáne tıisti baǵdarlamalarmen qamtamasyz etilgen 119 ІT synyp pen 21 STEM kabınetteriniń qyzmeti oqýshylardyń tsıfrlyq saýattylyǵyn qalyptastyryp, jańa ıdeıalarmen jumys isteý mashyǵyn jetildirýde.