Almaty oblysynda 69 oqýshynyń ata-anasy asınhrondy oqytýǵa ótinish berdi
Bıylǵy oqý jylynda orta bilim berý uıymdary sanıtarııalyq-epıdemıologııalyq talaptardy saqtaı otyryp, oqý protsesin dástúrli formatta bir nemese eki aýysymda uıymdastyrady.
Oblystaǵy barlyq mektepter dezınfektsııalyq quraldarmen qamtamasyz etildi. Aldaǵy tańda qyrkúıek-jeltoqsan aılarynda taǵy da sanıtarlyq qural-jabdyqtardy alýǵa 435 mıllıon teńge qarjy qarastyrylǵan. Bul oqýshylardyń qaýipsizdigi úshin jasalǵan amal. Jetisý jerinde ustazdardyń 99,9%-y vaktsına aldy, sondaı-aq, tehnıkalyq qyzmetkerlerdiń 95,4%-y vaktsına saldyrdy.
Quzyrly organ ókilderi barlyq sanıtarlyq talaptar saqtalady, dástúrli oqýǵa eshteńe kedergi emes degenmen ata-analar balalarynyń densaýlyq jaǵdaıyna baılanysty úıden oqytýǵa ótinish jazyp jatyr. Bul týraly Almaty oblysy bilim basqarmasy basshysynyń orynbasary Aıjan Adambekova málimdedi.
«Ata-anasy nemese basqa da zańdy ókilderiniń ótinishi negizinde sozylmaly aýrýy bar nemese aýrýy asqynyp turǵan kezde úı jaǵdaıynda asınhrondy, ıaǵnı ózdiginen oqytýǵa ruqsat beriledi. Asınhrondy oqytý bilim alýshynyń ata-anasynyń nemese zańdy ókilderiniń ótinishi negizinde mektep dırektorynyń buıryǵymen rásimdeledi. Búgingi kúni oblys boıynsha 69 oqýshynyń ata-anasy nemese zańdy ókili asınhrondy oqytýǵa ótinish qaldyrdy»,-dep atap ótti ol.
Oblysta balalar arasynda koronavırýs juqtyrýshylar sany artyp, sońǵy 7 aıda 208 bala ınfektsııalyq statsıonarǵa túsken. Onyń ishinde 54-i bir jasqa deıingi náreste. Bul qatarda 1-5 jas aralyǵyndaǵy 57-i bala bar. 68-i 5-14 jastaǵylar bolsa, 14 pen 17 jastaǵy jasóspirimderdiń 29-y indetti juqtyrǵan.