Almaty oblysynda 65 jastan asqandarǵa kóshede sebepsiz júrýge bolmaıdy
TALDYQORǴAN. QazAqparat - Almaty oblysynda 65 jastan asqan zeınetkerlerge kóshede sebepsiz júrýge bolmaıdy. Óńirde karantındik sharalar qaıta kúsheıtildi, dep habarlaıdy QazAqparat tilshisi.
Almaty oblysynda karantındik shekteýler aldaǵy senbi, jeksenbi kúnderi kúsheıtiledi. 65 jastan asqan egde adamdarǵa dúken men dárihanaǵa barmasa, kóshede emin-erkin júrýge bolmaıdy. Sol sııaqty kámeletke tolmaǵandar da eresektersiz júrmeýi tıis. Ulttyq parkter men týrıstik nysandarda aldaǵy eki kúnge adam qabyldaý toqtatyldy. Al demalyp jatqan azamattar sanıtarlyq ara qashyqtyq saqtaýy qajet. Sondaı-aq qoǵamdyq kólikterde de talaptar qatańdatylmaq.
«Árbir avtobýsta bir qyzmetker bolady. Ol maskasy joq adamdy betperdesiz avtobýsqa kirgizbeıdi. Sonymen qatar oryndyqtar avtobýsta tolyp qalsa, artyq kisini kirgizbeý kerek. Sóıtip biz shoǵyrlanýdy boldyrmaımyz. Ol talapty ákimder de, tasymaldaýshylar da oryndaýǵa mindetti», -deıdi Almaty oblysynyń bas memlekettik sanıtarlyq dárigeri Qaırat Baımuhanbetov.
