Almaty oblysynda 641 bıznes sýbektisine nesıe tólemin keıinge shegerýge jaǵdaı jasaldy

TALDYQORǴAN. QazAqparat - Memleket basshysynyń tapsyrmasyna oraı Almaty oblysynda daǵdarysqa qarsy sharalar sheńberinde 119 myń bıznes sýbektisi salyq yntalandyrýyna qol jetkizdi, 641 sýbektige 24 mlrd teńge nesıe tólemin keıinge shegerýge jaǵdaı jasaldy. Bul týraly Nur-Sultan qalasynda Ortalyq kommýnıkatsııalar qyzmetinde ótken brıfıng kezinde Almaty oblysynyń ákimi Amandyq Batalov aıtty, dep habarlaıdy QazAqparat tilshisi.

Ákimniń aıtýynsha, óńirdegi 6,5 myń jalger úshin jeke sektorda jalǵa alý quny 30%-dan 90%-ǵa deıin tómendetilgen, 690 bıznes sýbektisi kommýnaldyq menshik múlikterin jalǵa alý tóleminen tolyq bosatyldy. Kásipkerlikti qoldaýǵa bıýdjetten 16,2 mlrd teńge bólindi.

«Osy aıtylǵan sharalardyń barlyǵy shaǵyn jáne orta bıznes kórsetkishterin ótken jyldyń deńgeıinde saqtaýǵa múmkindik berdi. Soǵan sáıkes shyǵarylǵan ónim men kórsetilgen qyzmet kólemi 1,7 trln teńgeni qurap, jalpy óńirlik ónimdegi shaǵyn jáne orta bıznestiń úlesi 34% jetedi. Bul kórsetkishti 2025 jylǵa qaraı 35 %-ǵa jetkizý tapsyrylǵan bolatyn, biz bul mejege kelesi jyly jete alamyz», - dedi A. Batalov.