Almaty oblysynda 64 maıdangerge 1 mln teńgeden berildi

TALDYQORǴAN. QazAqparat - Qazir elimizdegi tótenshe jaǵdaıǵa baılanysty Almaty oblysynda aldaǵy merekeler jańa formatta ótetin bolady. Bul týraly Jetisy Media aqparattyq alańynda málim boldy, dep habarlaıdy QazAqparat tilshisi.

Búgingi kúni Taldyqorǵan qalasynda 10 UOS ardageri, 1 452 tyl ardageri, 65 UOS ardageriniń jesiri, fashızmniń tutqyny bolǵan 1 adam bar.

«Aıtýly merekeniń basty qaharmandary UOS ardagerleri nazardan tys qalmaq emes. Barlyǵyna birdeı áleýmettik, materıaldyq kómek kórsetiledi», - deıdi Taldyqorǵan qalasy ákiminiń orynbasary Sáýle Amanbaıqyzy.

Jeńistiń 75 jyldyǵyna oraı, oblystyq bıýdjetten Ekinshi Dúnıejúzilik soǵystyń qatysýshylaryna, múgedekterine, barlyǵy 10 163 adamǵa 1 jolǵy materıaldyq kómek kórsetiledi. Osy maqsatta qazynadan 386 mln teńge qarastyrylǵan. Qazir oblys boıynsha 64 UOS ardageri bar, olardyń árqaısysyna 1 mln teńgeden berildi.

Almaty oblysynda 9 soǵys tutqyny turady. Olardyń árqaısysyna 100 myń teńgeden beriledi dep josparlanǵan. Qorshaý kezinde Lenıngrad qalasynda kásiporyndarda jumys istegen jáne qalany qorǵaǵany úshin medalmen marapattalǵandarǵa 60 myń teńgeden tólenedi. Chernobyl apatyna qatysqan adamdarǵa 50 myń teńgeden beriledi. Jetisý óńirinde Ekinshi dúnıejúzilik soǵysynda qaza tapqandardyń jesirlerine jalpy sany - 9 521 adamǵa 30 myń teńgeden tabystalady. Atalǵan qarjylaı kómekti kórsetý úshin bıýdjetten 285 mln teńge bólingen.

Joǵary da aıtyp ótken qarjy 30 sáýirge deıin maıdangerlerge jáne olarǵa teńestirilgen barlyq sanattaǵy tulǵalarǵa tólenetin bolady.

Almaty oblysy jastar saıasaty máseleleri jónindegi basqarmasy maıdan ánderinen tikeleı efırde onlaın kontsert uıymdastyrýdy josparlaǵan. Oǵan 28 ónerpaz qatysady.

Sondaı-aq, Almaty oblysynyń mádenıet, arhıvter jáne qujattama basqarmasynyń basshysy Márlen Qapashulynyń aıtýynsha, 1 mamyr men 9 mamyr aralyǵynda oblysta 1 728 onlaın kontsert pen tikeleı efır ótkiziledi. 25 mýzeı bul aralyqta 417 onlaın ekskýrsııa uıymdastyrady. Al kitaphanalar 1 243 onlaın kitap kórmesi men tarıhı sabaqtar ótkizedi. Sonymen qatar, oblystyq ardagerler uıymynyń suraýymen «Otan úshin ot keshkender» atty kitap jaryq kóredi. Al, maıdan shebinde oryndalǵan ánderdi bir taspaǵa jınaqtap maıdangerlereg taratyp berý kózdelgen.