Almaty oblysynda 602 azamat «Chernobyl» tósbelgisimen marapattaldy
Marapat Taldyqorǵan qalasynda ótken Chernobyl apaty qurbandaryn eske alýǵa jáne Almaty oblystyq «Chernobyl ardagerleri men múgedekteri» qoǵamdyq birlestiginiń 25 jyldyǵyna arnalǵan «Erlikke taǵzym» atty saltanatty jıynda tapsyryldy. Eń aldymen jınalǵandar qurban bolǵandardy bir mınýt únsizdikpen eske alyp, iri apattyń saldaryn joıýǵa qatysqandarǵa taǵzym etti.
Jıynda sóz alǵan oblys ákiminiń birinshi orynbasary Lazzat Turlashov Chernobyl apatyna baılanysty statıstıkalyq derekterdi atap ótti. Onyń aıtýynsha, atom elektr stansasyndaǵy apat zardaptaryn joıýǵa 32 myńnan astam qazaqstandyq qatysqan. Sonyń ishinde Almaty oblysynyń 2 myńdaı turǵyny bar.
«Prezıdentimiz Nursultan Ábishuly Nazarbaevtyń basshylyǵymen elimiz táýelsizdikke qol jetkizgen tusta Memleket basshysy eń aldymen ıadrolyq qarýdan bas tartyp, Semeı polıgonyn jabý týraly tarıhı sheshim qabyldady. Óıtkeni Chernobyl apaty búkil álemge atom energııasynyń baqylaýdan shyǵyp ketse qandaı kúıge ushyratynyn kórsetip berdi. Sonymen qatar bul qaıǵyly oqıǵa óz ómirlerin aıamastan apattyń zardabyn joıýǵa atsalysqan adamdardyń erik-jigeri men batyrlyq úlgisin de tanyta aldy. Búgin biz chernobyldyq erlerdi eske alýǵa jınalyp otyrmyz. Árqaısylaryńyzdyń sol kezeńdegi is-áreketterińiz - búgingi urpaq úshin erliktiń úlgisi», - dedi L. Turlashov.
Saltanatty shara marapattaý rásimimen jalǵasyp, tıisti marapattardy oblys ákiminiń birinshi orynbasary Lazzat Turlashov tabystady. Solardyń qatarynda Chernobyl apatynyń zardaptaryn joıýǵa qatysýshy retinde L. Turlashovqa da marapat berildi.
Jalpy 1986 jyly Chernobyl atom elektr stansasynda bolǵan iri apattyń zardaptaryn joıýǵa Almaty oblysynan 2 myńnan astam azamat attanǵan bolsa, búginde olardyń 602-si ortamyzda.
