Almaty oblysynda 600 oryndyq jańa mektep ashyldy
TALDYQORǴAN. QazAqparat - Búgin Eńbekshiqazaq aýdanyna qarasty Esik qalasynda 600 oryndyq jańa mektep ashyldy. Sharaǵa oblys ákimi Amandyq Batalov qatysyp, oqýshylardy, olardyń ata-analary men ustazdardy qýanyshty sátterimen quttyqtady, dep habarlaıdy QazAqparat tilshisi.
Óziniń quttyqtaý sózinde óńir basshysy memlekettik qoldaý men Elbasynyń qazaqstandyq óskeleń jas urpaqqa degen turaqty qamqorlyǵynyń arqasynda bıylǵy jyly Almaty oblysynda 41 jańa mekteptiń qurylysy júrgizililip jatqandyǵyn tilge tıek etti. Onyń 35-i aǵymdaǵy jyldyń sońyna deıin paıdalanýǵa beriletin bolsa, 24-i Bilim kúni qarsańynda berilgeli tur. Sonyń ishinde búgingi saltanatty túrde ashylyp jatqan №1 Rahat orta mektebi de bar ekendigin atap ótti.
«Qurmetti oqýshylar jáne ata-analar! Sizderdi shyn júrekten osynaý qýanyshty sátterińizben quttyqtaımyn. Jańa mekteptiń qabyrǵasynda sizder tolyq múmkindikterińizdi paıdalana otyryp, sapaly bilim alyp, óz kúshterińizge senim tanytyp, tárbıeli de sanaly azamat bolyp shyǵatyndyqtaryńyzǵa tolyq senim bildiremin. Mekteptiń pedagogıkalyq ujymynyń jumysyna tabys, joǵary kórsetkishter men sáttilik tileımin, - dedi Amandyq Batalov.
Osydan keıin Bilim kiltin tabystaý rásimi qalyptasqan úrdiske saı mektep dırektory Bıbigúl Býkaevaǵa tabystaldy. Jańa mekteptiń lentasy qıylǵannan keıin óńir basshysy mekteptiń ishine enip, bıologııa kabıneti men laboratorııasyn, sondaı-aq ózge de oqý kabınetterin aralap kórdi.
Eske salar bolsaq, qurylys jumystaryn «Jóndeý qurylys» JShS júrgizdi. Jobanyń jalpy smetalyq quny - 1,4 mlrd teńge. Mektep eki qabatty, 600 oqýshyǵa arnalǵan. Mektepte qajetti jabdyqtarmen qamtamasyz etilgen fızıka, hımııa kabınetteri, akt jáne sport zaldary, ashana, mýltımedııaly-lıngafondyq kabınet pen ózge de kabınetter qarastyrylǵan. Mekteptiń pedagogıkalyq quramynda 83 muǵalim bar.
