Almaty oblysynda 600 oryndyq mektep paıdalanýǵa berildi
TALDYQORǴAN. QazAqparat - Almaty oblysynyń Qarasaı aýdanynda 600 oryndyq jańa mektep paıdalanýǵa berildi. Kólaşy aýylynda ashylǵan bilim shańyraǵy «Nurly jol» baǵdarlamasy aıasynda salyndy, dep habarlaıdy QazAqparat tilshisi.
3 qabatty ǵımarat zamanaýı úlgide salynǵan. Mektepte 200 oryndyq májilis zaly, ashana, 2 sportzal, 2 mýltımedııalyq kabınet pen zerthanalar bar. Sondaı-aq 7 ınteraktıvti taqtamen jabdyqtalǵan. Bul Qarasaı aýdanynda 2017 jyly «Nurly jol» baǵdarlamasy aıasynda ashylǵan 8-shi mektep.
Jalpy Jańashamalǵan aýyldyq aımaǵynda búginde 9 myńnan asa oqýshy oqıdy. 5 mektep bar. Sonyń 2-ýi Kólaşy aýylynda. 2013 jyly «100 mektep, 100 aýrýhana» baǵdarlamasy aıasynda jańa mektep salynsa, táýelsizdiktiń 26 jylynda ekinshi ǵımarattyń qabyrǵasy kóterildi.
Aıta ketý kerek, Qarasaı aýdanynda byltyr 47 mektepte 45 myńnan asa oqýshy oqyǵan. Al bıyl bilim alatyn bala sany 52 252-ge ósti.
