Almaty oblysynda 60-qa jýyq mal urlaǵan qylmystyq top ustaldy
TALDYQORǴAN. QazAqparat - Almaty oblysy Jambyl aýdanynyń tártip saqshylary mal urlyǵyn kásip qyldy degen kúdikke ilingen qylmystyq topty quryqtady. Top quramynda 23-26 jastaǵy jergilikti úsh turǵyn bolǵan, dep habarlaıdy QazAqparat tilshisi.
Bultartpas aıǵaqtar arqasynda olardyń mal urlyǵynyń jeti deregine qatysy bary dáleldendi. Tergeý barysynda ózderiniń jymysqy áreketterin ótken jyldyń tamyz aıynan beri iske asyrǵany anyqtaldy.
«Atalǵan derekter boıynsha QR Qylmystyq kodeksiniń 188-baby 3-bóligine sáıkes sotqa deıingi tergeý amaldary júrgizilip jatyr. Olardyń birqatar mal urlyǵyna, onyń ishinde iri malmen qatar, qoı urlyǵyna qatysy bary dáleldendi. Top múshelerine 3 jylqyny, 5 sıyrdy jáne 48 qoıdy urlady degen aıyp taǵyldy. Turǵyndarǵa keltirilgen materıaldyq shyǵyn eseptelýde», - dep atap ótti oblystyq Polıtsııa departamentiniń baspasóz qyzmetinen.
Jedel-izdestirý sharalary barysynda kúdiktilerden urlanǵan maldy satyp alýshy da anyqtaldy. Tártip saqshylary satyp alýshydan qoldy bolǵan 3 sıyrdy tárkilep, zańdy ıelerine qaıtardy. Áshkere bolǵan qylmystardyń ishinde malynyń qoldy bolǵany týraly ishki ister organdaryna habar bermegen turǵyndardyń da maly bar. Tártip saqshylary barymtashylar jaıylymnan soıyp alyp ketken maldardyń zańdy ıelerin anyqtaý jumystaryn da júrgizýde.
Qylmystyq is aýdandyq polıtseılerdiń óndirisinde. Kúdiktilerdiń óńirdegi buǵan uqsas ózge de qylmystarǵa qatystylyǵy tekserilýde. Sonymen qatar, polıtseıler urlanǵan maldy satyp alýshyny da qylmystyq jaýapkershilikke tartý máselesin qarastyrýda. Qazirgi ýaqytta qylmystyq top músheleri mekenjaıyn ózgertpeý týraly mindettememen bosatyldy. Olar mingen kólik sotqa deıingi tergeý amaldary aıaqtalǵanǵa deıin arnaıy turaqqa toǵytyldy.
