Almaty oblysynda 6 jańa mektep ashyldy
Máselen bir ǵana Іle aýdanynda úsh mektep paıdalanýǵa berildi. Qaroı aýylyndaǵy bilim shańyraǵy 900 orynǵa eseptelgen, Boraldaı kentinde 300 balaǵa arnalǵan jáne Qosózen aýylynda 600 oryndyq úsh jańa mektep saltanatty túrde esigin aıqara ashty.
Sondaı-aq, Panfılov aýdany Aqqudyq aýylynyń oqýshylary úshin 120 oryndyq jańa mektepte alǵashqy qońyraý soǵyldy. Mektep 2736,84 sharshy metr aýmaqty alyp jatyr. Oqý ornynda 28 oqytýshy jumys isteıtin bolady.
Qarasaı aýdanynyń Batan aýylynda da 450 oryndyq jańa oqý orny paıdalanýǵa berildi.
Eskeldi aýdanynyń Abaı aýylyndaǵy 25 balaǵa arnalǵan mektepke deıingi shaǵyn ortalyǵy bar 180 oryndyq orta mekteptiń qurylys jumystary aıaqtaldy. Jańa oqý ornynda sportzal, ashana jáne tehnıkanyń sońǵy nusqasy boıynsha jabdyqtalǵan ondaǵan kabınet bar. Jańa oqý ornynyń qurylysyna oblys bıýdjetinen bir mıllıard teńgeden astam qarjy bólindi. «Talas-qurylys» merdigerlik uıymy nysandy merziminde aıaqtap, ony jergilikti aýyl turǵyndarynyń qýanyshyna oraı paıdalanýǵa berdi. Mektep ǵımaraty jertóle, eki qabat jáne 9 bloktan turady.
2021 jyldyń sońyna deıin 2700 oryndyq taǵy 3 mekteptiń qurylysy aıaqtalýy tıis. Búgingi tańda olardyń qurylysy Іle aýdanynyń Japek batyr aýylynda, Qarasaı aýdanynyń Úshterek aýylynda jáne Talǵar qalasynda júrgizilýde.
Aıta keteıik, aldaǵy oqý jyly qatań sanıtarlyq-epıdemıologııalyq talaptarmen ótedi. Vırýstyń balalar arasynda taralýyn boldyrmaý úshin barlyq mektepter qaýipsizdik sharalaryn ustanady. Almaty oblysy bilim basqarmasynyń málimetinshe, 52 myńnan astam muǵalim koronavırýsqa qarsy vaktsına alǵan.
