Almaty oblysynda 6 myń basqa arnalǵan mal bordaqylaý alańy iske qosyldy
TALDYQORǴAN. QazAqparat - Almaty oblysynda 6 myń basqa arnalǵan mal bordaqylaý alańy iske qosyldy, dep habarlaıdy QazAqparat tilshisi.
Kerbulaq aýdanynda ornalasqan Shadıev sharýa qojalyǵy «qazaqtyń aq bas sıyryn», «alataý» men «angýs» tuqymyn ósirýdi qolǵa aldy.
Basty maqsat - Elbasynyń 100 naqty qadamynda kórsetilgen et eksporty áleýetin arttyrý tapsyrmasyn oryndaý. Sharýashylyq birden josparlanǵan qýatyna shyqty. 6 myń bas iri qara baılaýda tur. Al 400-den astam «qara angýs» sıyryn Avstralııadan ákeldi. Qystyń qamyn jaz oılaǵan qojalyq mal azyǵyn molynan daıyndady.
Sharýashylyqtyń is baqarýsyshy Jandos Ataǵojaevtyń aıtýynsha, 35 myń oram shóp, 10 myń tonna júgeri, 5 myń tonna arpa, 2 myń tonna bıdaı bastyrylǵan. Demek bıylǵy qystan qınalmaı shyǵýǵa qor jetkilikti. Kásiporyn Almaty qalasyndaǵy et kombınattaryna jylyna 1200 tonna ónim ótkizýdi josparlap otyr. Sharýashylyq etti eksportqa shyǵarýǵa da daıyn. Al, aýdanda ornalasqan et óńdeý kombınaty maldy barlyq talapqa saı etip soıyp jóneltýge múmkindik beredi.
Jalpy Almaty oblysynda irili-usaqty 60 mal bordaqylaý alańy bar. Jyl basynan beri 6 myń tonnadan astam sıyr eti óndirildi.
