Almaty oblysynda 590 túlek «Altyn belgi» ıegeri atandy
TALDYQORǴAN. QazAqparat - Almaty oblysynda 590 túlek «Altyn belgi» ıegeri atandy. Jetisýlyq úzdik oqýshylardy oblys ákimi Amandyq Batalov quttyqtap, olardyń árqaısylaryna «Altyn belgi» belgisin óz qolymen tabystady, - dep habarlaıdy QazAqparat tilshisi.
Mektep túlekterin quttyqtaǵan Amandyq Batalov oqýshylar ózderiniń talapshyldyǵy men izdenimpazdyǵynyń arqasynda ómir boıyna azyq bolar eń qundy baılyq bilimin tolyqtyryp, jetistikter jolyna qadam basyp otyrǵanyn aıtty. Bul oraıda ata-analar men muǵalimderdiń eńbegin de atap ótti.
«Sizder álemge Táýelsiz Qazaqstan dep tanylǵan memlekette týyp-ósý, el damýymen birge bilim alý baqyty buıyrǵan urpaqsyzdar. Bul sizderge maqtanyshpen qatar zor mindetter júkteıdi», - dep atap ótti óńir basshysy.
Saltanatty sharada oblystyń úzdik oqýshylarynyń atynan Taldyqorǵan qalasyndaǵy úsh tilde oqytatyn daryndy balalarǵa arnalǵan №20 mektep lıtseıiniń túlegi Asyljan Balatursynov pen Іle aýdanyndaǵy M. Maqataev atyndaǵy № 13 mekteptiń túlegi Arýjan Tólebekova sóıledi. Kórsetilgen qoldaýlarǵa alǵystaryn aıta otyryp, ózderine artylyp otyrǵan senimniń údesinen shyǵatyndaryna sendirgen túlekter eldiń ıgligi úshin bilim alyp, eńbek etýge sóz berdi.
Túlekter úshin estrada ánshileri óner kórsetip, «Bilim sharlary» ushyryldy. Ádemi kesh kontserttik baǵdarlamamen qorytyndylandy.
Jalpy Almaty oblysynda 14 268 túlek mektep bitirip, onyń 590-y «Altyn belgi» tósbelgisine, 528 túlek úzdik attestatqa ıe boldy.
