Almaty oblysynda 53 kooperatıv quryldy
TALDYQORǴAN. QazAqparat - Byltyrdan beri Almaty oblysynda 53 kooperatıv quryldy. Onyń ishinde 10 kooperatıvti jeke úı sharýashylyǵyn júrgizip otyrǵan turǵyndar ashty, dep habarlaıdy QazAqparat tilshisi.
Óńirde usaq sharýashylyqtardy irilendirý jumystary júıeli túrde júzege asýda. Máselen, Uıǵyr aýdanyndaǵy Sharyn aýyldyq okrýginde 13 sharýa «Albekova» qojalyǵy negizinde kooperatıv qurdy. 1000 gektarǵa jýyq egis alqaby men 510 gektar jaıylym biriktirildi.
«Munan bólek etti jáne sútti baǵyttaǵy iri qara bir qoraǵa qamaldy. Kooperatıv músheleriniń múmkindikteri eselene tústi. 13 qojalyq biriktik. Mal, jer, tehnıka ortaq. Jumysty birge istep, jemisin birge kóremiz», deıdi sharýa qojalyǵynyń basqarýshysy Ámirden Qadyrov.
Eldegi irilendirý saıasatyna Elbasynyń bıylǵy Joldaýynda da erekshe mán berilgen. Prezıdent tapsyrmasyn shalǵaı aýyldardaǵy el-jurt bir aýyzdan qoldap, júzege asyrýǵa atsalyspaq.
