Almaty oblysynda 527,3 mln teńgeniń kontrabandalyq temeki ónimi anyqtaldy

NUR-SULTAN. QazAqparat - Almaty oblysynyń salyq organy qyzmetkerleri quny 527,3 mln. teńge bolatyn kontrabandalyq temeki ónimin anyqtaǵan. Bul týraly QR Qarjy mınıstrligi Memlekettik kirister komıtetiniń baspasóz qyzmeti habarlady.

Baspasóz qyzmetiniń málimtterine qaraǵanda, Qaskeleń qalasy, Almaty-Bishkek trassasynyń 29 shaqyrymynda ornalasqan «Krıstall» qonaq úı-turaq kesheniniń aýmaǵynda 925 myń qorap zańsyz temeki (18,5 mln. temeki tartý birligi) ónimi anyqtaldy.

Aktsızdik markasy joq kontrabandalyq temeki ónimi tekserýge Almaty oblysy boıynsha Memlekettik kirister departamentiniń jáne Almaty oblysy boıynsha Ekonomıkalyq tergeý departamentiniń qyzmetkerleri qatysty.

Tekserý nátıjesi boıynsha barlyq materıaldar QR Qylmystyq kodeksiniń 233-baby boıynsha buzýshylyq belgilerimen Almaty oblysy boıynsha Ekonomıkalyq tergeý departamentine berildi.

Tólenbegen aktsız shyǵyn somasy 227,6 mln. teńgeni quraıdy, temekiniń jalpy quny 527,3 mln. teńgeni qurady.

«Qylmystyq kodekstiń 233-babynyń 1-bóligine sáıkes memleketke shyǵyn keltirgen aktsızdeletin taýarlardy sáıkestendirý quraldarymen jáne (nemese) esepke alý-baqylaý markalarymen tańbalaýdyń tártibi men qaǵıdalaryn buzý – múlki tárkilenip nemese onsyz, belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyrý jazasyn qarastyrady. Nemese bir myń aılyq eseptik kórsetkishke deıingi mólsherde aıyppul salynyp ne sol mólsherde túzeý jumystaryna ne tórt júz saǵatqa deıingi merzimge qoǵamdyq jumystarǵa tartylady. Sondaı-aq bir jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrý jazasy taǵaıyndalýy múmkin»,-delingen habarlamada.

Foto: philnews.ph