Almaty oblysynda 52 jolaýshy mingen avtobýs buzylyp qaldy
TALDYQORǴAN. QazAqparat – Polıtsııa tas jolda synyp qalǵan reıstik avtobýstyń jolaýshylaryna sýmen jáne azyq-túlikpen kómektesti, dep habarlaıdy «QazAqparat» HAA tilshisi oblystyń polıtsııa departamentiniń baspasóz qyzmetine silteme jasap.
Vedomstvoda habarlaǵandaı, 52 adam mingen jolaýshylar avtobýsy Almatydan Shyǵys Qazaqstanǵa barar jolda synyp qalǵan. Bul týraly estigen Alakól aýdanynyń tártip saqshylary jolaýshylarǵa sý men azyq-túlik ákelip, kómektesken.
«Qazir dalada aptap ystyq tur, al jolaýshylardyń arasynda qapyryqty kótere almaıtyn balalar men egde jastaǵy adamdar bar. Sondyqtan biz birden shól qysqan adamdarǵa jyldam aýyz sý jetkizýdi oıladyq. Oqıǵa ornynda avtobýstyń buzylý sebepterin anyqtap, aýdan ortalyǵynan qajetti saımandardy taýyp, avtobýsty jóndedik. Birneshe adam kómek kelgenin kútpeı, joldaǵy kólikterge minip ketti. Adamdar sý, tamaq iship alyp, Semeı jaqqa saparyn jalǵastyrdy», - dedi Alakól aýdandyq polıtsııa bastyǵynyń orynbasary Qasen Aqbasov.
Belgili bolǵandaı, avtobýs Shyǵys Qazaqstan oblysynda ornalasqan demalys oryndarynyń birine jol tartqan. Jolda qalyp qoıǵan kóliktiń ishinde zardap shekkender bolmady.
