Almaty oblysynda 50 myńǵa jýyq adam senbilikke shyqty
«Bul senbilik Oraza aıynyń alǵashqy kúnimen tuspa tus kelip otyr. Bar musylman Oraza aıyn saǵynyshpen kútedi. Oraza – jan tazalyǵyna bastaýshy aı. Qabyl bolsyn!
Bizdiń búgin senbilikke shyǵyp, aýlamyzdy, kóshemizdi, qalamyzdy tazartýymyz da saýapty is. Sońǵy eki jylda pandemııadan osyndaı senbilikke shyǵa almadyq. Búgin sol ıgi dástúrdi qaıta jańǵyrtyp, belsendilerdiń bastamasymen senbilik uıymdastyrylýda. Turǵyndar óz qalaýymen tazalyq jumystaryna atsalysyp, bereke-birligin kórsetip jatyr», - dedi Taldyqorǵan qalasynda ótken senbilikke qatysqan oblys ákimi Qanat Bozymbaev.
Tazalaý, abattandyrý men kógaldandyrý sharalaryna oblystaǵy barlyq mekeme, uıymdar, kommýnaldyq qyzmet salalary belsene qatysty. Atap aıtqanda, oblys boıynsha 50 myńǵa jýyq azamat 4 myńdaı kósheni, 18 myńdaı alańqaıdy qoqystan tazartty. Sol sııaqty aımaqtaǵy 200-ge jýyq saıabaqty, 950 shaqyrym aryqty qoqystan aryltyp, 14 myńǵa jýyq kóshet egý josparlanǵan.
