Almaty oblysynda 5 jyl buryn adam óltirgen kúdikti ustaldy
TALDYQORǴAN. QazAqparat - Almaty oblysynda 5 jyl buryn adam óltirgen kúdikti ustaldy. Qazir 28 jastaǵy Qapshaǵaı qalasynyń turǵyny qamaýǵa alyndy, dep habarlaıdy QazAqparat tilshisi.
Oblystyq ІІD baspasóz qyzmetiniń málimetinshe, oqıǵa 2012 jyldyń kókteminde Qaratal aýdanynda bolǵan. Qanabek Baıseıitov aýylynyń mańyndaǵy qystaqtardyń birinde malshy bolyp júrgen 55 jastaǵy er adamdy óltirip ketken.
«55 jastaǵy adamnyń joǵalǵandyǵy jóninde quzyrly organǵa aryz túspegen. Sondyqtan osy jaıtqa baılanysty mán-jaı tolyqtaı tekserildi. Sońynda kúdikti bolǵan jaıtty moıyndap, máıittiń qaı jerge jerlengenin aıtyp berdi. Malshynyń múrdesi jerden qazyp alynyp, saraptama taǵaıyndaldy», dedi oblystyq ІІD baspasóz qyzmeti.
Polıtseıler malshynyń úsh balasy bar ekenin anyqtady. Onyń ekeýi Reseıde turady, biraq ákelerimen aralaspaıdy. Al úshinshi balasy ne sebepti ákesiniń joǵalǵandyǵy jóninde polıtseılerge habar bermegeni anyqtalatyn bolady.
Belgili bolǵandaı, ustalǵan kúdikti 2016 jyly qylmystyq jaýapkershilikke tartylyp, sottyń úkimimen oǵan eki jylǵa bas bostandyǵynan shekteý jazasy taǵaıyndalǵan. Qazir kúdiktiniń ústinen adam óltirý baby boıynsha is qozǵalyp, tergeý jalǵasýda. 28 jastaǵy jigit óziniń túsiniktemesinde malshyny pyshaqtap óltirgenin aıtty.
