Almaty oblysynda 5-synyp oqýshysy anasyna renjip, úıinen ketip qalǵan
TALDYQORǴAN. QazAqparat - Almaty oblysy Kóksý aýdanynyń polıtseıleri úıinen ketip qalǵan jasóspirimdi izdep tapty, dep habarlaıdy QazAqparat tilshisi.
Kóksý aýdanynyń ortalyǵyna jaqyn mańda ornalasqan aýyldardyń biriniń turǵyny tún jarymynda polıtsııaǵa habarlasyp, 11 jasar ulynyń úıge oralmaǵanyn habarlaǵan. Oqıǵa ornyna jedel jetken tártip saqshylary 5-synypta oqıtyn jasóspirimniń anasyna renjip, tústen keıin belgisiz baǵytta ketkenin jáne buǵan deıin bulaı jasamaǵanyn anyqtady.
«Jasóspirimniń mekenjaıyn anyqtaý úshin barlyq polıtsııa jasaqtary jumyldyryldy. Onyń saldary túrli qaıǵyly jaǵdaıǵa ákeletinin bilgendikten ártúrli boljam jasaldy. Іstiń jaqsy aıaqtalatynyna sendik jáne erteńinde joǵalǵan balany aýdan ortalyǵynyń kóshesinen taptyq»,- deıdi Kóksý aýdany polıtsııa bóliminiń bastyǵy, polıtsııa podpolkovnıgi Ramıl Gımadıev.
Aýdandyq ıývenaldy polıtsııa ókilderi joǵalyp tabylǵan jasóspirim men onyń anasyna túsindirý jumysyn júrgizdi. Jasóspirimge úıden ketip qalýdyń sońy jamandyqqa ákelýi múmkin ekeni jáne taǵy qaıtalansa, arnaıy esepke alynatyny eskertildi.
