Almaty oblysynda 5 mekteptiń dırektory jumystan bosatyldy
TALDYQORǴAN. QazAqparat - Almaty oblysynda 5 mekteptiń dırektory jumystan bosatyldy. Qyzmetimen qosh aıtysqandardyń úsheýi Jambyl aýdanynan jáne Panfılov, Kerbulaq aýdanyndaǵy bilim oshaqtarynyń basshylary bar, dep habarlaıdy QazAqparat tilshisi.
Ózge dırektorlardyń arqasyn terletken bul sheshim oblystyq bilim basqarmasynyń alqa májilisinde jarııa etildi. Bárine taǵylǵan min ortaq, mektepterdiń bilim sapasy tómen. Atap aıtqanda Jambyl aýdanyndaǵy Yntymaq, Úńgirtas, Qastek orta mektebi men Jarkenttegi №6 jáne Kerbulaq aýdanyndaǵy Maıtóbe aýylynyń mektepteriniń dırektorlary óz mindetterin oıdaǵydaı atqara almaǵan. Olar basqarǵan mektepterde bilim sapasy, oqýshylar úlgerimi men UBT-nyń kórsetkishi óte tómen.
«Bilim sapasyn kóterý úshin ishki tártipti nyǵaıtý kerek. Onsyz bolmaıdy. Jańa aıtqandaı 5 mektep dırektoryn jumystan bosatý týraly buıryqty 10 kúnnin ishinde bilim basqarmasyna ákelińizder», - dedi Almaty oblysy ákiminiń orynbasary Jaqsylyq Omar.
