Almaty oblysynda 5 balasyna alıment tólemegen ana jaýapkershilikke tartyldy
TALDYQORǴAN.QazAqparat - Almaty oblysynda bes balasyn tastap, alıment tólemeı júrgen ana ákimshilik jaýapkershilikke tartyldy, dep habarlaıdy QazAqparat tilshisi.
Taldyqorǵan mamandandyrylǵan aýdanaralyq ákimshilik sotynyń qaýlysymen azamatshaǵa 10 aılyq eseptik kórsetkish kóleminde aıyppul salyndy. Al 35 jastaǵy kelinshek kúıeýimen 2016 jyly zańdy túrde ajyrasqan. Alaıda balalardy ózine qaldyrýdan bas tartqan. Sodan beri kámeletke tolmaǵan 2 ul 3 qyzdy ákesi asyrap keledi. Sot sheshimimen byltyr azamatshaǵa alıment tóleý mindettelgen. Biraq bir jyldan astam ýaqyt boıy áıel bir tıyn da tólemegen. Qazirgi tańda kelinshektiń týǵan balalarynyń aldynda 1 mln teńgeden astam bereshegi bar. Bir jyl boıy iz-tússiz joǵalǵan áıelge quzyrly organ izdeý jarııalap, Qaraǵandy oblysynan tapty. Kelinshek sol óńirdiń týmasy eken. Ol sot aldynda turaqty jumysym bolmaǵandyqtan, alımentti tóleı almaı júrmin dep aqtaldy.
