Almaty oblysynda 49 myń bala birinshi synypqa bardy
TALDYQORǴAN. QazAqparat - Búgin Almaty oblysy ákiminiń orynbasary Jaqsylyq Omar Erkin aýylyndaǵy №11 orta mektep oqýshylary men Taldyqorǵan gýmanıtarlyq-tehnıkalyq kolledjiniń stýdentterin Bilim kúnimen quttyqtady, - dep habarlaıdy QazAqparat Almaty oblysy ákiminiń baspasóz qyzmetine silteme jasap.
«Qymbatty oqýshylar, qurmetti ustazdar men ata-analar! Sizderdi shyn júrekten Bilim kúnimen jáne jańa oqý jylynyń bastalýymen quttyqtaımyn. Memleket qoldaýynyń arqasynda tek bıylǵy jyldyń ózinde oblysymyz boıynsha 35 jańa mektep paıdalanýǵa berilmek. Al olardyń 24-i osy kúni aýdan-qalalarymyzda alǵashqy oqýshylaryna óz esikterin ashty. Bıylǵy jyly alǵash ret mektep tabaldyryǵyn 49 000 búldirshiniń attaǵany da barshamyz úshin aıtýly jańalyq. Osy balalardyń barlyǵy jáne ózderińiz de oqýda ozat, sharalarǵa qatysýda belsendi, alǵyr ári tártipti bolatyndyqtaryńyzǵa senim bildiremin. Tabystyń kilti bilimde ekendigin esterińizden shyǵarmańyzdar. Barshańyzǵa bar jaqsylyq pen sáttilik tileımin», - dedi oblys ákiminiń orynbasary J.Omar.
Saltanatty jıyn aıaqtalǵannan keıin Jaqsylyq Omar mekteptiń ishki qurylymymen tanysyp, ashanasy men akt zalyn aralap shyqty. Erkindegi bul mektep ótken jyly kúrdeli jóndeýden ótken bolatyn. Osydan keıin óńir basshysynyń orynbasary Taldyqorǵandaǵy gýmanıtarlyq-tehnıkalyq kolledj stýdentterin oqý jylynyń bastalýymen quttyqtap qaıtty.
Esterińizge salar bolsaq, Bilim kúnine oraı oblystyń halqy tyǵyz ornalasqan Qarasaı, Jambyl, Іle, Talǵar, Eńbekshiqazaq, Panfılov jáne Raıymbek aýdandarynda jalpy sany 24 jańa mektep paıdalanýǵa berildi. Olardyń ekeýi kúni keshe Jambyl jáne Qarasaı aýdandarynda berilgen bolsa, qalǵan 22-si búgin ashyldy.
