Almaty oblysynda 40-tan astam kásiporyn eksportqa baǵyttalǵan
TALDYQORǴAN. QazAqparat - Almaty oblysynda 40-tan astam kásiporyn eksportqa baǵyttalǵan. Óńirdiń negizgi seriktesteri - Reseı, Belarýs, Ýkraına, Qyrǵyzstan, Ózbekstan tázizdi elder.
Bul týraly Memleket basshysynyń Qazaqstan halqyna Joldaýyn iske asyrý barysy týraly Almaty oblysynyń ákimi Amandyq Batalovtyń tóraǵalyǵymen ótken aktıv jıynynda oblys ákiminiń orynbasary Jaqsylyq Omar aıtty, dep habarlaıdy QazAqparat óńir basshysynyń baspasóz qyzmetine silteme jasap.
J. Omardyń sózine súıensek, Joldaý mindetterine oraı ázirlengen oblystyq is-sharalar josparyna sáıkes júıeli jumystar atqarylýda. «Ekport - 2020» baǵdarlamasyna kásiporyndardyń belsendi qatysýyn qamtamasyz etý sharalary júrgizilip jatyr. Aýdan, qala ákimderimen birlesip eksportqa shyǵýǵa áleýetti kásiporyndardyń tizbesi ázirlenip, olarǵa memleket tarapynan kórsetiletin eksportty qoldaý sharalary týraly aqparattar joldanǵan. Oblysta búgingi kúni eksportqa baǵyttalǵan jańa ınvestıtsııalyq jobalar - farmatsevtıkalyq, et óńdeý, avtokólik maıyn óndirý jobalary belgilenip otyr.
Sondaı aq jıynda óńir boıynsha memlekettik-jekemenshik áriptestik negizi de nátıjeli júzege asyp jatqany aıtyldy. Máselen, búgingi kúni jalpy quny 20,5 mlrd. teńge bolatyn 11 joba boıynsha jumystar júrgizilip jatyr. Memlekettik-jekemenshik áriptestik negizinde Taldyqorǵan, Qapshaǵaı qalalary men Uzynaǵash aýylynda 3 balabaqsha ashylsa, Qarasaı aýdanynda jáne Tekelidegi Qora ózeninde qosymsha stansalar, 5 servıstik daıyndaý ortalyqtary jáne Aqsý qant zaýyty jobasy iske asyrylmaq.
