Almaty oblysynda 4 jastaǵy bala balabaqshanyń terezesinen shatyrǵa shyǵyp ketti
TALDYQORǴAN.QazAqparat - Almaty oblysynda balabaqshanyń terezesinen 4 jastaǵy bala shatyrǵa shyǵyp ketip, aman qaldy. Oqıǵa Qapshaǵaı qalasyndaǵy «Aqdıdar» balabaqshasynda bolǵan, dep habarlaıdy QazAqparat tilshisi.
Balabaqsha shatyryna 4 jastaǵy balanyń shyǵyp ketkeni túsirilgen beınejazba birden áleýmettik jelige tarap, halyqtyń narazylyǵyn týdyrdy.
Shatyrdyń ústinde júrgen búldirshindi dereý tárbıeshi baıqap, balanyń artynan ózi de shatyrǵa shyǵyp, kómekke umtylǵan. Balabaqsha meńgerýshisiniń sózinshe, bala jatyn bólmeniń terezesin ashyp, syrtqa shyǵyp ketken. Oqıǵa qyrkúıektiń ekisi kúni tańǵy saǵat 8:15-ter shamasynda bolǵan.
«Bala ómirine qaýip tóngen joq. Osy oqıǵadan keıin balanyń anasyn shaqyryp, bolǵan oqıǵa jaıly aıttyq. Ol kisi balasynyń mazasyz ekenin, erke ekenin jetkizdi. Úıde de osyǵan uqsas oqıǵalardyń bolǵanyn aıtyp berdi. Top tárbıeshisine tártiptik jaza qoldanyp, qatań sógis berildi. Al balabaqsha eki qabattan turady. Ekinshi qabatta 8 top ornalasqan. Sol toptardyń terezesine temir tor qoıýǵa tótenshe jaǵdaılar ruqsat bermeıdi», - dedi «Aqdıdar» balabaqshasynyń meńgerýshisi Gúlzada Aqynbekova.
«Aqdıdar» — memlekettik balabaqsha. Bul jerde 370 bala tárbıelenip jatyr. Al tárbıeshiler sany 35.
