Almaty oblysynda 4 jasar bala velosıped teýip júrip, joǵalyp ketken
TALDYQORǴAN. QazAqparat - Almaty oblysy Jambyl aýdany Uzynaǵash aýylynyń ortalyq kósheleriniń birinde patrýldik polıtsııa qyzmetkerleri óz úıin taba almaı, jylap júrgen balany kezdestirgen, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, tártip saqshylary sábıdi tynyshtandyryp, aýdandyq polıtsııa bólimine alyp kelgen. Ol jerde ony shaımen, tortpen tamaqtandyryp, artynsha ata-anasyn izdestirýdi uıymdastyrǵan.
Balanyń otbasy Uzynaǵash aýylynyń shetinde turatyny anyqtaldy.
«Nátıjesinde biz balanyń 29 jastaǵy anasyn taptyq. Tórt jasar bala velosıped teýip júrip, ata-anasynan alysqa ketip qalǵany anyqtaldy. Bala úıiniń ornalasqan jeri men ata-anasynyń esimderi týraly esh nárse aıta almady. Degenmen, patrýldik polıtsııa qyzmetkerleri anasynyń jeke basyn anyqtady. Bul oraıda, ulyn izdestire bastaǵan ana da sábıi men bizdiń qyzmetkerlerimizdi kórip, qatty qýandy»,- deıdi Almaty oblysy Jambyl aýdandyq polıtsııa bóliminiń bastyǵy Ashat Tegenbaev.
