Almaty oblysynda 4 aýdan, 1 qalanyń ákimine aıyppul salyndy

ALMATY. QazAqparat - Almaty oblysynda ekologııalyq talaptardy buzǵany úshin Іle, Qarasaı, Talǵar, Eńbekshiqazaq aýdandary men Qonaev qalasy ákimdikteriniń basshylary ákimshilik jaýapkershilikke tartyldy, dep habarlaıdy QazAqparat tilshisi.

Almaty oblysynyń mamandandyrylǵan tabıǵat qorǵaý prokýratýrasy Ekologııa deparrtamentimen birlesip qatty turmystyq qaldyqtarmen jumys isteý salasyndaǵy zańdylyqqa taldaý júrgizdi. «Qazaqstan Ǵarysh Sapary» AQ geoportaly arqyly oblys aýmaǵynda 351 stıhııalyq qoqys oryndary anyqtaldy, atap aıtqanda Eńbekshiqazaq aýdany – 61, Іle aýdany – 91, Qarasaı aýdany – 56, Talǵar aýdany – 33, Qonaev qalasy-85. 247 jabaıy qoqys orny joıyldy, 104 qoqys orny áli bar.
Almaty oblystyq prokýratýrasynyń málimetinshe, jabaıy qoqys jergilikti atqarýshy organdar tarapynan baqylaýdyń joqtyǵynan paıda bolǵan. Sonyń saldarynan topyraqtyń atmosferalyq aýanyń lastanýy, sanıtarlyq jaǵdaıdyń nasharlaýy múmkin. Buǵan buqaralyq aqparat quraldary men áleýmettik jelilerde jarııalanǵan syndar dálel bola alady.

«Prokýratýranyń usynysy boıynsha ekologııa departamenti Іle, Qarasaı, Talǵar, Eńbekshiqazaq aýdandary men Qonaev qalasynyń ákimderiniń basshylaryn ákimshilik jaýapkershilikke tartty. Olarǵa 100 AEK-ten 306 300 teńge mólsherinde aıyppul salyndy»,- dep atap ótti vedomstvodan.