Almaty oblysynda 32 myńnan astam jumys orny ashyldy
ASTANA. QazAqparat - Almaty oblysynda jyl basynan beri 306 ınvestıtsııalyq joba júzege asyrylyp, 32 myńnan astam jumys orny ashyldy, dep habarlaıdy QazAqparat tilshisi.
«Búgingi kúni bizde quny 5,7 trln teńgelik 306 ınvestıtsııalyq joba júzege asyrylyp, olarda 32 myńnan astam jumys orny ashyldy. Olardyń qatarynda - 9 joba transulttyq kompanııalardyń, 44-i - sheteldikterdiń qatysýymen júzege asyryldy. Bıylǵy tamyz aıynda Qazaqstanda tuńǵysh ret «WILO» nemis kompanııasynyń sorǵy quraldaryn óndirý kesheni iske qosyldy. Keshe ótken ındýstrııalandyrý kúninde jeke logıstıkalyq jáne qoımalyq ınfraqurylymy bar, «Rolton» brendimen ónim shyǵaratyn «Mareven Fýd» zaýyty ashyldy. Onyń jyldyq tabys kólemi - 21 mlrd teńgeni quraıdy. Zaýyt óniminiń shamamen 70% Orta Azııa elderine eskportqa shyǵaratyn bolady», - dedi Almaty oblysynyń ákimi Amandyq Batalov OKQ-de ótken baspasóz máslıhatynda.
Sondaı-aq, oblys basshysy jumysshylardyń jalaqysyn ósirý týraly málimettermen de bólisti.
«Qazirgi kezde oblystaǵy 14 myń jumys berýshi 32 myń jumysshynyń jalaqysyn kóterýge daıyn. Odan bólek, bıýdjettik uıymdardyń 41 myń qyzmetkeriniń aılyǵy orta eseppen 35% ósti. Sol sııaqty keler jyldyń 1 qańtarynan 133,5 myń adam Prezıdenttiń salyqtyq júktemeni tómendetý jónindegi bastamasynan keıin joǵarylatylǵan jalaqy alatyn bolady. Jyl basynan beri oblystaǵy ortasha aılyq jalaqy 5% ósip, 114 myń teńgeni qurap otyr. Halyqtyń naqty aqshalaı kirisi 0,8%-ke ósti (68 myń teńge). Al turǵyn úı-kommýnaldyq sharýashylyǵy qyzmetteriniń tarıfterin tómendetý boıynsha «Qapshaǵaıjylý» tarıfti 77%, «Taldyqorǵanjylýservıs» - 16,3%, «Jetisý Energotreıd» - 2,4% tómendetti», - dep atap ótti A. Batalov.
