Almaty oblysynda 31 jylqyny aıdap áketken barymtashy ustaldy
TALDYQORǴAN.QazAqparat - Almaty oblysynda barymtashy 31 jylqyny aıdap áketip bara jatqan jerinen ustaldy. 25 jastaǵy kúdikti buǵan deıin de mal urlap sottalǵan bolyp shyqty, dep habarlaıdy QazAqparat tilshisi.
«19 tamyz kúni polıtseıler barymtashyny Kóksý ózeninen ótetin aspaly kópir mańynda 31 jylqyny ótkizip jatqan kezde qolǵa túsirgen. Eń qyzyǵy, tártip saqshylary kúdiktini maldyń ıesi aryzdanbaı jatyp qolǵa túsirgen. Talǵar aýdanynyń turǵyny Kerbulaq aýdanyndaǵy jaıylym jerinen 34 jylqym urlandy dep jergilikti polıtsııa bólimine 20 tamyzda aryzdanyp kelgen. Alaıda dál sol sátte onyń maly qaýipsiz jerde turǵanyn bir-aq bilgen»,-dedi Almaty oblystyq Polıtsııa departamentiniń baspasóz qyzmetinen.
Qýanyshy qoınyna syımaǵan mal ıesi oblystyq polıtsııa departamentine jedel áreketi úshin alǵys bildirdi.
Al maldy urlaǵan kúdikti tergeý barysynda alǵashqy túsiniktemesin bere bastady. Onyń aıtýynsha, Sarybulaq aýylynyń ekinshi fermasynyń mańynda ıesiz jaıylyp júrgen bir úıir jylqyny baıqap qalǵan. 34 basty ol úsh táýlik boıy óziniń turǵylyqty jeri Kóksý aýylyna qaraı aıdaǵan. Jol-jónekeı 3 jylqy úıirden qalyp qalǵan, deıdi kúdikti. Qazirgi tańda kúdikti qamaýǵa alynyp QR QK 188 baby, 4-shi bóligi, 3-shi tarmaǵy boıynsha sot aldy tergeý jumystary jalǵasýda.
