Almaty oblysynda 3 jasar balany qorlaǵan kútýshi áıelge úkim shyqty
TALDYQORǴAN. QazAqparat - Almaty oblysynyń Talǵar aýdanynda úsh jasar balany azaptaǵan kútýshi áıelge úkim shyqty, dep habarlaıdy QazAqparat tilshisi.
Jergilikti turǵyndardyń úıine kútýshi bolyp jumysqa ornalasqan kelinshek úsh jasar balamen jalǵyz qalǵan kezde oǵan aıǵaılaǵan, uryp-soqqan. Ol týraly balanyń áke-sheshesi úıge ornatylǵan beınebaqylaý kamerasynan bilgen.
«Aıyptalýshy óz aıybyn moıyndady. Ol sot sheshimimen QR QK 110-baby, 2-bóligi, 1-tarmaǵyna («Kórineý kámeletke tolmaǵan adamǵa qatysty udaıy uryp-soǵý nemese ózge de kúsh qoldaný áreketteri») sáıkes, úsh jylǵa bas bostandyǵynan aıyrý jazasyna kesildi», - delingen úkimde.
Oblystyq sot ókilderiniń aıtýynsha, ol jazasyn qylmystyq-atqarý júıesiniń ortasha qaýipsiz mekemesinde óteıdi.
