Almaty oblysynda 3 tonnaǵa jýyq zańsyz aýlanǵan balyq tárkilendi
TALDYQORǴAN. QazAqparat - Almaty oblysynyń tártip saqshylary múddeli memlekettik organdarmen birlese otyryp, tabıǵat qorǵaý zańnamasynyń talaptaryn buzýdyń 346 deregin anyqtaǵan. Tirkelgen derekter boıynsha qylmystyq óndiris qozǵaldy, dep habarlaıdy QazAqparat tilshisi.
«Bıyl tabıǵat qorǵaý tártibin buzýdyń 31 deregi boıynsha qylmystyq is qozǵaldy. Onyń ishinde zańsyz balyq aýlaýdyń – 13, zańsyz ań aýlaýdyń 10, aǵashtardy otaýdyń 4, jer qoınaýyn zańsyz ıgerýdiń 3 deregi bar. Sotqa deıingi tergeý amaldary aıaqtalǵan soń ister sotqa joldanatyn bolady»,- dedi Almaty oblysy PD JPQB Tabıǵat qorǵaý polıtsııasynyń ınspektory Baǵlan Rymjanov.
Sondaı-aq, 304 azamat ákimshilik jaýapkershilikke tartylǵan. Ań aýlaý tártibin saqtamaǵan 200 jýyq ańshyǵa tıisti hattama toltyrylsa, zańnama talabyn buzǵan 67 balyqshy aıyppul arqalady.
Tártip saqshylary jyl basynan beri brakonerlerden zańsyz aýlanǵan 3 tonnaǵa jýyq balyq, 5 qaıyq pen zańsyz kesilgen 6 tekshe metrden astam aǵash tárkilegen. Sonymen qatar, quqyq buzýshylardan 136 dana qural-jabdyq tabylǵan. Onyń ishindegi 30 astam atys qarýynyń 9 danasy zańsyz saqtalǵany áshkere boldy.
